पीक कर्जासाठी पुणे जिल्ह्यातील शेतकऱ्यांवर हेलपाटे मारण्याची वेळ

थकीत कर्जधारकांना सरकारने पीक कर्ज देण्याच्या सूचना दिल्या आहेत. मात्र, त्यासंदर्भात परिपत्रक आले नसल्याने बॅंका कर्ज देण्यास हलगर्जीपणा करीत आहेत. त्यामुळे शेतकऱ्यांना वारंवार बॅंकांकडे हेलपाटे मारावे लागत आहेत. - घनश्याम तोडकर, शेतकरी, तळेगाव ढमढेरे, जि. पुणे.
संग्रहित छायाचित्र
संग्रहित छायाचित्र

पुणे  ः कर्जमाफीच्या गोंधळामुळे जिल्ह्यातील ज्या शेतकऱ्यांनी थकीत पीक कर्जाची रक्कम भरलेली नाहीत अशा शेतकऱ्यांना तातडीने खरिपासाठी पीककर्ज देण्याच्या सूचना सरकारने दिल्या आहेत. या सूचनांकडे अनेक राष्ट्रीयीकृत आणि खासगी बॅंका दुर्लक्ष करीत असून शेतकऱ्यांना पीक कर्ज देण्यास टाळाटाळ करीत आहे. त्यामुळे थकीत पीक कर्जधारक शेतकऱ्यांना नव्याने पीक कर्ज घेण्यासाठी बॅकांकडे हेलपाटे मारण्याची वेळ आली आहे.  

खरीप हंगाम तोंडावर आला असून अनेक शेतकऱ्यांना काही कारणांनी आर्थिक अडचणींचा सामना करावा लागत आहे. त्यातच कोरोनाच्या पार्श्वभूमीवर सुरु असलेल्या लॉकडाउनमुळे शेतकऱ्यांचे मोठे नुकसान झाले असून त्यांना आधार देण्याची गरज आहे. शेतकरी आर्थिक अडचणीत असताना पीककर्ज वाटपाकडे जिल्ह्यातील काही राष्ट्रीयीकृत व खाजगी बॅंकांनी दुर्लक्ष केले आहे. यास्थितीत शेतकऱ्यांनी जिल्हा बॅंकेचा आधार घेतला आहे. पुणे जिल्हा मध्यवर्ती सहकारी बॅंकेने मोठ्या प्रमाणात शेतकऱ्यांना कर्ज दिल्याचे जिल्हा अग्रणी बॅंकेकडील अहवालावरून स्पष्ट होते. 

सध्या जिल्ह्यात ३१ मार्च अखेरपर्यत ज्या शेतकऱ्यांनी कर्जाची नियमित परतफेड केली आहे. अशा शेतकऱ्यांना सहकारी व खाजगी बॅंकांकडून प्राधान्याने कर्ज पुरवठा करण्यात येत आहे. मात्र, ज्या शेतकऱ्यांनी परतफेड केली नाही, अशा शेतकऱ्यांनीही कर्ज पुरवठा करण्यात यावा यासाठी सरकारने आदेश दिले आहेत. तरीही बॅंका शेतकऱ्यांना कर्ज देत नसल्याचे समोर आले आहे.  

पुणे जिल्हा अग्रणी बॅंकेने जिल्ह्यातील सर्व बॅंकांना खरीप हंगामासाठी शेतकऱ्यांना एक एप्रिलपासून पीक कर्ज वाटप सुरू करण्याच्या सूचना दिल्या आहेत. जिल्हा अग्रणी बॅंकेने खरिपासाठी दोन हजार ६३ कोटींचे पीककर्ज वितरणाचे उद्दिष्ट ठेवले आहे. त्यापैकी २८ मेअखेरपर्यंत एक लाख सहा हजार ४७४ शेतकऱ्यांना ९२५ कोटी ७७ लाख म्हणजेच ४१ टक्के पीककर्ज वाटप करण्यात आले आहे. यामध्ये राष्ट्रीयीकृत आणि खाजगी बॅंकांनी शेतकऱ्यांना कर्ज देण्यात हात आखडता घेतला आहे.

मुख्यमंत्री, कृषिमंत्र्यांनी थकीत कर्जधारकांना पीककर्ज देण्याच्या सूचना दिल्या आहेत. मात्र, बॅंका त्यास प्रतिसाद देत नसून शेतकऱ्यांना पीककर्ज वितरीत करत नसल्याचे चित्र आहे. त्यामुळे शेतकरी आणखी अडचणीत येत आहे, असे सणसर येथील शेतकरी पांडुरंग रायते यांनी सांगितले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com