सोलापुरातील शेतकऱ्यांची अडवणूक कायम

सोलापूर   ः ‘कोरोना’मुळे शहरातील २१ ठिकाणी महापालिकेने भाजीपाला विक्रीसाठी ग्राहक आणि किरकोळ विक्रेत्यांची सोय केली. पण शहरात विक्रीसाठी येणाऱ्या शेतकऱ्यांची अडवणूक अद्यापही संपलेली नाही. शेतीमाल वाहतुकीला अद्यापही पोलिस असहमती दर्शवत असल्याने आणि ठराविक ठिकाणीच बसण्याचा आग्रह करत असल्याने या सगळ्यात शेतकरी मात्र वाऱ्यावर सोडल्याचे चित्र आहे.

गेल्या पंधरवड्यापासून भाजीपाला आणि फळांचे लिलाव बंद आहेत. सोशल डिस्टन्सिंगचे कारण देत अद्यापही जिल्हाधिकारी, पोलिस आयुक्त, बाजार समितीतील लिलावासाठी परवानगी देत नाहीत. त्याऐवजी शहरातील २१ ठिकाणी शेतकऱ्यांनी भाजीपाला आणून विकावा अशी सोय केली आहे. पण ज्या-त्या भागातील शेतकऱ्यांना त्या-त्या भागातील विक्रेत्यांना भाजी विकावी आणि तिथेच बसावे, अशी अट घातली आहे. त्यामुळे ही अट गैरसोयीची होते आहे. त्यातच आजही शहराच्या सगळ्या नाक्यावर पोलिस बंदोबस्त आहे.

या ठिकाणी अनेकवेळा पोलिस शेतकऱ्यांची अडवणूक करतच आहेत. शेतीमाल अत्यावश्यक सेवेत असतानाही विनाकारण चौकशी करुन त्रास देण्याचे प्रकार सर्रास सुरु आहेत. त्यामुळे शहरात महापालिकेने भाजीविक्रीसाठी सोय केली असली, तरी शेतकऱ्यांना त्यात कितपत स्थान मिळणार आणि किती शेतकरी तिथे जाऊन भाजी विक्री करणार हा प्रश्नच आहे. या सगळ्यामध्ये महसूल, महापालिका आणि पोलिस प्रशासन यांच्यात गोंधळ असल्याचे चित्र आहे.   शेतकऱ्यांना पासची अडचण कायम सोलापूर शहरानजीकच्या उत्तर सोलापूर, दक्षिण सोलापूर, मोहोळ आणि अक्कलकोट तालुक्यात गेल्या सहा दिवसांत संपूर्णपणे संचारबंदी लागू करण्यात आली होती. त्यामुळे या कालावधीत ठराविक वेळ असल्याने तुलनेने कमी भाजीपाला शहराला पुरवठा झाला. शिवाय पासशिवाय शहरात जाता येत नसल्याने अनेकांनी तो जाग्यावरच सोडला. आता संचारबंदी उठल्याने पुन्हा शहराकडे भाजीपाला न्यावा, तर पासची अडचण आहे. कृषी विभागाकडे विचारणा करता पोलिस विभागाकडून पास घ्या, असे सांगितले जाते. पण पोलिसही आॅनलाईन भरा, बघू, देऊ, असे सांगत आहेत. त्यामुळे नुसती टोलवा टोलवी सुरु आहे, याबाबतीतही शेतकरी वाऱ्यावरच असल्याचे दिसते.