पातूरमधील शेतकऱ्यांना मिळणार घरपोच डिझेल

पातूर, जि. अकोला : सद्यःस्थितीत सुरु असलेल्या लाॅकडाउनमुळे शेतीविषयक कामांनाही अडचणी येत आहेत. प्रामुख्याने शेतीसाठीच्या यंत्रांना लागणारे डिझेल आणण्यासाठी मोठी कसरत करावी लागत आहे. शेतीविषयक कामांसाठी वापरले जाणारे ट्रॅक्टर व शेतमाल ने-आण करण्यासाठी वापरल्या जाणाऱ्या वाहनांना डिझेलचा तुटवडा भासत होता. यावर जिल्हयातील एका पेट्रोलपंप चालकाने तोडगा काढत शेतकऱ्यांसाठी थेट घरपोच डिझेल सेवा सुरु केली आहे. याला जिल्हाधिकाऱ्यांनीही परवानगी दिल्याने शेतकऱ्यांसाठी ही दिलासादायी बाब ठरली आहे.

पातूर-वाशीम रोडवर असलेल्या दुग्गड पेट्रोल पंपाचे संचालक पंजाबराव मोडक यांनी शेतकऱ्यांना मदतीसाठी डिझेलची घरपोच सेवा देण्याचा उपक्रम सुरू केला. या मोबाईल ब्राऊजरचे उद्‍घाटन जिल्हा पुरवठा अधिकारी काळे, तहसीलदार दिपक बाजड, ठाणेदार गजानन गुल्हाने, पंजाबराव मोडक, बाळा लाहोरे व सर्व कर्मचाऱ्यांच्या उपस्थित सोशल डिस्टन्सिंचे पालन करून करण्यात आले.

राज्यात घरपोच डिझेल सेवा देणारा पातूर शहरातील हा एकमेव पेट्रोल पंप असल्याचे यावेळी सांगण्यात आले. या सेवेचा लाभ शेतकऱ्यांसह इतर ग्राहकांना घ्यायचा असल्यास त्यांनी ९६०४७४७३००, ९८५०४८६८९१ मोबाईल क्रमांकावर संपर्क साधावा. सेवा देणाऱ्या टँकरची क्षमता सहा हजार लिटर असून घरपोच सेवा देत असल्यामुळे कोणत्याच प्रकारचा अतिरिक्त भुर्दंड ग्राहकांना पडणार नाही.

ज्या दरात पेट्रोल पंपावर डिझेल मिळते त्याच दरात घरपोच सेवा मिळणार असल्यामुळे शेतकऱ्यांसह ग्राहकांना फायदा होईल. लॉकडाउन असल्यामुळे शेतकऱ्यांना शेतीसाठी व शेतीपूरक व्यवसायासाठी डिझेलची समस्या येऊ नये म्हणून जिल्हाधिकारी जितेंद्र पापळकर यांनी उपक्रमाला त्वरित मान्यता दिली. केंद्र सरकारच्या या उपक्रमांमधून महाराष्ट्राला दहा गाड्या देण्यात आल्या आहेत.