बुलडाण्यातील शेतकऱ्यांनी सोयाबीन अनुदानासाठी बाजारसमितीत संपर्क साधावा ः जिल्हा उपनिबंधक

 बुलडाणा   ः जिल्ह्यातील शेतकऱ्यांनी २०१६-१७ मधील ऑक्टोबर, नोव्हेंबर व डिसेंबर या तीन महिन्यात बाजार समितीमध्ये सोयाबीन विक्री केली आहे. अशा सोयाबीन उत्पादक शेतकऱ्यांना प्रतीक्विंटल २०० रूपयांप्रमाणे जास्तीत जास्त २५ क्विंटल मर्यादेत अनुदान जाहीर करण्यात आले होते. या सोयाबीन अनुदानाची रक्कम शेतकऱ्यांना त्यांच्या बँक खात्यावर अदा करण्यात आली आहे. मात्र, जे शेतकरी काही कारणांमुळे वंचित राहिले त्यांनी तातडीने त्यांच्या बाजार समितीकडे अद्ययावत माहिती द्यावी, असे आवाहन जिल्हा उपनिबंधक महेंद्र चव्हाण यांनी केले आहे.

शासनाने २०१६-१७ च्या हंगामात सोयाबीन उत्पादकांना दिलासा देण्यासाठी २०० रुपये प्रतिक्विंटल अनुदान जाहीर केले होते. यासाठी प्रत्येक शेतकऱ्याला २५ क्विंटलची मर्यादा घालून देण्यात आली होती. मात्र, बँक खाते तपशील अथवा इतर माहिती अचूक नसल्याने काही शेतकऱ्यांच्या बँक खात्यावर अनुदानाची रक्कम जमा झालेली नाही. अशा शेतकऱ्यांनी त्यांना सोयाबीन अनुदानाची रक्कम प्राप्त झालेली नसल्यास त्यांनी संबंधीत कृषी उत्पन्न बाजार समितीच्या कार्यालयामध्ये त्यांच्या अर्जात नमूद बँक पासबुक अद्ययावत नोंदीसह व इतर तपशील बुधवारपर्यंत (ता.२७) सादर करावा. अन्यथा प्राप्त झालेली व वितरणानंतर शिल्लक असलेली अनुदानाची रक्कम शासनाकडे समर्पित करण्यात येईल, असेही श्री. चव्हाण यांनी म्हटले आहे.