नगर जिल्ह्यात गतवर्षीच्या शिल्लक खतांवरच यंदाच्या खरिपाची मदार

नगर  ः नगर जिल्ह्याला खरिपासाठी २ लाख ९१ हजार टन खतांची गरज आहे. तशी मागणीही केलेली आहे. मात्र त्यातील आतापर्यंत १९ हजार ६६२ टन खतांचा पुरवठा झाला आहे. गेल्यावर्षीची १ लाख दोन हजार टन खते शिल्लक आहेत. दोन्ही मिळून सध्या ४० टक्के खते उपलब्ध आहेत. त्यामुळे यंदाच्या खरिपाची गतवर्षीच्या खतांवरच मदार असल्याचे दिसून येत आहे.

नगर जिल्ह्यात खरिपाचे सरासरी क्षेत्र चार लाख ७८ हजार ६३८ हेक्टर आहे. यंदा पाच लाख ८३ हजार ९५० हेक्टर क्षेत्रावर पेरणी व कापूस लागवड होण्याचा अंदाज कृषी विभागाने व्यक्त केला असून त्यानुसार नियोजन केले जात आहे. खरिपासाठी जिल्ह्याला २ लाख ९१ हजार टन खतांची गरज आहे. त्यानुसार कृषी विभागाने मागणीही केलेली आहे. मात्र गतवर्षीचे एक लाख दोन हजार टन खत शिल्लक आहे.

यंदा आतापर्यंत मागणीच्या सात टक्के म्हणजे १९ हजार ६६२ टन खत पुरवठा झाला आहे. गतवर्षीचे शिल्लक खत धरुन ४० टक्के म्हणजे १ लाख २१ हजार ५८३ टन खत आतापर्यंत उपलब्ध झालेले आहे, असे कृषी विभागाकडून सांगण्यात येत आहे. चांगला पाऊस झाला तर खरिपाच्या पेरण्यांना पंधरा दिवसांत सुरवात होईल. त्यानुसार खत पुरवठा होणे अपेक्षित असल्याचे शेतकरी सांगत आहेत. सध्याच्या उपलब्ध खताचा विचार करता शिल्लक खतांवर खरिपाची मदार असल्याचे दिसत आहे.

बांधावर बियाणे, खताचे काय? ‘कोरोना’च्या पार्श्वभूमीवर शेतकऱ्यांनी खते, बियाणे खरेदीसाठी दुकानांमध्ये गर्दी करु नये यासाठी कृषी विभागाने बांंधावर खते देणार असल्याचे सांगितले. मात्र नगर जिल्ह्यात एखाद्या तालुक्याचा अपवाद वगळता अजूनही बांधावर खते देण्याचे नियोजन झाल्याचे दिसत नाही. आत्मा अंतर्गत शेतकऱ्यांनी नोंदणी करावी एवढेच आवाहन केले जात आहे. मात्र प्रत्यक्षात जिल्हा अधिक्षक कृषी अधिकारी कार्यालयातून कसलेही मार्गदर्शन मिळताना दिसत नाही. एप्रिल-मे मध्ये पुरवठा झालेले खत (टन) ः युरिया ः ७३५८, डीएपी ः २५८३, एमएपी ः ४१४, एसएपी ः २१२२, संयुक्त खते ः ७१८६.