पुणे विभागात एक लाख ३८ हजार हेक्टरवर चारा पिकांची लागवड

पुणे  ः यंदा वेळेवर पाऊस झाल्याने चारा पिकांच्या लागवड क्षेत्रात चांगली वाढ झाली आहे. पुणे विभागात आत्तापर्यंत एक लाख ३८ हजार ५७८ हेक्टरवर चारा पिकांची लागवड झाली आहे, अशी माहिती कृषी विभागाच्या सूत्रांनी दिली.

दरवर्षी खरिपात चारा पिकांची लागवड कमी होते. त्यामुळे रब्बीत काही प्रमाणात चारा टंचाई भासत असल्याने शेतकरी पर्याय म्हणून उसाच्या वाड्याचा वापर करतात. पुणे विभागात एक लाख हेक्टरच्या जवळपास मका, कडवळ, लुसर्नग्रास, नेपिअर ग्रास, बाजरी अशा विविध चारा पिकांची लागवड केली जाते. काही वेळेस यापेक्षाही कमी प्रमाणात चारा पिकांची लागवड होते. साधारणपणे लागवडीनंतर  दोन ते तीन महिन्यात चाऱ्याचे उत्पादन सुरु होते. काही शेतकरी उत्पादन झालेला चारा वाळवून तो टप्याटप्याने वापरतात. त्यामुळे उन्हाळ्यात चारा टंचाई कमी होण्यास मदत होते.

गेल्या वर्षी विभागात सुमारे एक लाख १७ हजार ८५० हेक्टरवर चारा पिकांची लागवड झाली होती. गेल्या वर्षीच्या तुलनेत यंदा २० हजार ७२८ हेक्टरने लागवड क्षेत्रात वाढ झाली आहे.  यंदा खरिपात नगर जिल्ह्यात ६७ हजार ३७० हेक्टरवर चारा पिकांची लागवड झाली आहे. नगर, पारनेर, कर्जत, नेवासा, राहुरी, संगमनेर, कोपरगाव, राहाता या तालुक्यांत बऱ्यापैकी चारा पिकांचे क्षेत्र आहे. जामखेड, पाथर्डी, शेवगाव, श्रीरामपूर, अकोले तालुक्यात कमी क्षेत्रावर चारा पिकांची लागवड झाली आहे.

पुणे जिल्ह्यात ४१ हजार ६८६ हेक्टरवर चारा पिकांची लागवड झाली आहे. यामध्ये हवेली, जुन्नर, खेड, आंबेगाव, शिरूर, बारामती, इंदापूर, दौंड, पुरंदर या तालुक्यांत मोठ्या प्रमाणात चारा पिकांची लागवड झाली आहे. मुळशी, भोर, मावळ, वेल्हे तालुक्यात अल्प क्षेत्रावर चारा पिकांची लागवड झाली आहे.

सोलापूर जिल्ह्यात अत्यंत कमी क्षेत्रावर चारा पिकांची लागवड झाली आहे. जिल्ह्यात २९ हजार ५२२ हेक्टरवर चारा पिके आहेत. दक्षिण सोलापूर,अक्कलकोट, मोहोळ, माढा, करमाळा, पंढरपूर, सांगोला, माळशिरस तालुक्यात बऱ्यापैकी चारा पिकांची लागवड झाली आहे. उत्तर सोलापूर, बार्शी, मंगळवेढा या तालुक्यांत अत्यंत कमी क्षेत्रावर चारा पिके आहेत.