पुणे जिल्ह्यात शेती यंत्रसामग्री, वाहनांसाठी इंधन उपलब्ध होणार

पुणे  : कोरोना विषाणूचा प्रादुर्भाव रोखण्यासाठी जिल्ह्यात टाळेबंदी जाहीर करण्यात आली आहे. यातून शेती विषयक कामांना सूट देण्यात आली आहे. शेतीसाठी लागणारी वाहने, यंत्रसामग्री, स्वयंचलित अवजारांसाठी इंधन उपलब्ध करून देण्याची मागणी शिरूरचे खासदार डॉ. अमोल कोल्हे यांनी केली होती. त्यानुसार शेतीकामांसाठी इंधन उपलब्ध करून देण्याच्या सूचना जिल्हाधिकारी कार्यालयाकडून पेट्रोल पंप चालकांना देण्यात आल्या आहेत.

शेतीविषयक कामे करण्यासाठी विशेषतः शेतावर जाण्यासाठी, तसेच शेतीकामे करणारे ट्रॅक्टर व इतर वाहनांसाठी पेट्रोल व डिझेलची आवश्‍यकता आहे. पंपावर शेतकऱ्यांना इंधन मिळण्यास अडचणी येत आहेत. शेतीकामांसाठी लागणारी यंत्रसामग्री चालविण्यासाठी, शेतकरी आणि शेतमजूरांना शेतावर जाण्यासाठी वाहनांना लागणारे इंधन मिळावे, अशी मागणी खासदार डॉ. कोल्हे यांनी खेडचे उपविभागीय अधिकारी संजय तेली यांच्याकडे केली होती.

टाळेबंदीच्या काळात शेतीशी निगडीत कामे सुरळीत पार पाडावीत, कृषी उत्पादनांची खरेदी विषयक कामे, मंडई, बाजार समित्यांची कृषी विषयक कामे, पीक पेरणी संबंधाने यंत्रांच्या दुरुस्तीसाठी आवश्‍यक कामे, दुकाने सुरू करण्यास परवानगी देण्यात आली आहे. त्यानुसार शेतीच्या कामांसाठी लागणाऱ्या ट्रॅक्टरसम वाहने, उपकरणे व इतर यंत्रांसाठी इंधन उपलब्ध करून देण्याच्या सूचना निवासी उपजिल्हाधिकारी डॉ. जयश्री कटारे दिल्या आहेत.