विस्तारीत ‘म्हैसाळ’ला तत्त्वतः मंजुरी मिळूनही सरकारचे दुर्लक्ष

सांगली  ः जत तालुक्‍यातील ६४ गावांना म्हैसाळ उपसा सिंचन योजनेतून पाणी देण्यासाठी तत्कालीन मुख्यमंत्री देवेंद्र फडणवीस यांनी सहाशे कोटींच्या निधीला तत्वतः मंजुरी दिली होती. या पार्श्र्वभूमीवर जलसंपदा मंत्री जयंत पाटील यांनी प्राधान्याने जत तालुक्यातील पाणीप्रश्न सोडविण्यासाठी पुढाकार घ्यायला हवा होता. परंतु तसे न करता मिरज तालुक्यातील वंचित गावांना पाणी देण्यासाठी तातडीने मंजुरी देण्यात आली. मग आम्हाला पाणी देण्यासाठी चालढकल का केली जात आहे, असा सवाल जतमधील शेतकऱ्यांनी उपस्थित केला.

जत तालुक्याच्या पूर्व भागातील ६४ गावांना सिंचन योजनेचे पाणी देणार अशी घोषणा गेल्या अनेक वर्षांपासून होत आहे. अद्यापही या भागाला पाणी मिळालेले नाही. तत्कालीन मुख्यमंत्री देवेंद्र फडणवीस हे प्रचारासाठी संख येथे आले होते. त्या वेळी त्यांनी या वंचित गावांना पाणी देण्यासाठी ६००कोटींच्या निधीला तत्त्वतः मंजुरी दिल्याचे सांगितले. त्यामुळे शेतकऱ्यांना पाणी मिळणार अशी आशा होती.   गेल्या काही वर्षात योजना पूर्ण करण्यासाठी गती आली. जत तालुक्यातील या योजनेचे काम अंतिम टप्प्यात आले असले तरी ६४ गावांचा पाणी प्रश्न निकाली निघालेला नाही. राज्यात महाविकास आघाडीचे सरकार आले. जिल्ह्यातील जयंत पाटील जलसंपदा विभागाचा कारभार पाहत आहेत. त्यांच्याकडून जतला मोठ्या अपेक्षा आहेत. मात्र सरकारने याकडे दुर्लक्ष केले असल्याने शेतकऱ्यांमधून तीव्र संताप व्यक्त होत आहे.