बाजार बंद असल्याने जनावरे खरेदी -विक्रीवर परिणाम 

पिंपोडे बुद्रुक, जि. सातारा  : ‘कोरोना’मुळे मोठ्या शहरांतून मागणी घटल्याने दुधाचे दर कोसळले आहेत. त्यातच संचारबंदीमुळे जनावरांचे बाजार बंद झाल्याने त्याचा परिणाम जनावरांच्या खरेदी-विक्रीवर झाला आहे. जनावरे सांभाळता येईनात आणि विकताही येत नाहीत, अशा दुहेरी स्थितीमुळे दूध उत्पादक शेतकरी अडचणीत सापडले आहेत. दुधाला मिळणाऱ्या कमी दरामुळे व्यवसायात गुंतवलेले भांडवलही निघत नसल्यामुळे शेतकरी मेटाकुटीला आले आहेत. 

ग्रामीण भागात शेतीपूरक म्हणून दुग्ध व्यवसाय मोठ्या प्रमाणात केला जातो. पाच महिन्यांपासून दुधाला ३२ रुपये प्रतिलीटर दर मिळत असल्याने अनेक तरुणांनी कर्ज काढून, तसेच शासकीय योजनेतून गाई खरेदी केल्या आहेत. अनेकांचे प्रपंच या व्यवसायावर चालतात. मात्र, ‘कोरोना’मुळे सर्वच मोठ्या शहरांमधून दुधाला मागणी घटली आहे. दुग्धजन्य पदार्थांनाही अपेक्षित मागणी नाही. त्यामुळे डेअरी चालकांनी दुधाचे दर कमी केले. याचा फटका दूध व्यवसायाला बसला आहे.