सातारा जिल्हा बँकेकडून नियमित कर्ज भरणाऱ्यांना व्याज सवलत 

सातारा : अवकाळी पाऊस व ‘कोरोना’च्या संकटामुळे शेतकऱ्यांना कर्जाचे हप्ते व व्याज भरणे जिकिरीचे झाले आहे. त्यामुळे द्राक्षबाग लागवड, कुक्कुटपालन, कृषी पर्यटन प्रकल्पाचे कर्जाचे जुलै २०१९ ते २०२० जून या कालावधीत नियमित कर्ज हफ्ते भरणा करणाऱ्या शेतकऱ्यांना जिल्हा बॅंकेच्या संचालक मंडळाने मार्च २०२० च्या नफ्यातून व्याज सवलत देण्याचा निर्णय घेतला आहे, अशी माहिती बॅंकेचे अध्यक्ष, आमदार शिवेंद्रसिंहराजे भोसले यांनी दिली.

ते म्हणाले, की दुष्काळात पाणीटंचाईच्या काळात दुष्काळग्रस्त भागात टँकरने पाणी वितरणासाठी बँकेने दोन कोटी खर्च करून जनतेला दिलासा दिला आहे. यावर्षी ‘कोरोना’चा संसर्ग रोखण्यासाठी सामाजिक बांधिलकीतून बॅंकेने एक कोटीची मदत मुख्यमंत्री साहाय्यता निधीस केली आहे. मोलमजुरी करून काम करणारे मजूर व गरजू कुटुंबांना त्यांच्या उदरनिर्वाहासाठी जीवनावश्‍यक अन्नधान्याचे किट उपलब्ध करून दिल्या आहेत. जिल्ह्यातील अवकाळी पाऊस व ‘कोरोना’ संकटामुळे अडचणीत आलेल्या शेतकऱ्यांना मदत करण्याचा निर्णय बँकेच्या संचालक मंडळाने घेतला आहे. द्राक्षबाग लागवड, कुक्कुटपालन व कृषी पर्यटन प्रकल्प उभारणीसाठी शेतकऱ्यांना बँकेने मोठ्या प्रमाणावर कर्जपुरवठा केला आहे. या कर्जदार शेतकरी सभासदांना जिल्हा बँकेकडून वसूलपात्र हप्ते वरील व्याजाची नियमित परतफेड करणाऱ्या कर्जदारांना सवलत देऊन आर्थिक दिलासा देण्याचा प्रयत्न केला आहे.