ग्रामीण भागात मनरेगाची कामे सुरु करण्याचे नियोजन  : मंत्री संदीपान भुमरे

मुंबई : टाळेबंदीच्या काळात ग्रामीण भागात रोजगाराचा प्रश्न निर्माण झाल्याच्या पार्श्वभूमीवर शासनाने संपूर्ण राज्यात महात्मा गांधी राष्ट्रीय ग्रामीण रोजगार हमी योजनेची कामे सुरु करण्याचे नियोजन केले आहे. शेतकरी, शेतमजूर व ग्रामीण भागातील नागरिकांनी शासनाच्या या योजनेचा लाभ घ्यावा असे आवाहन रोजगार हमी योजना मंत्री संदिपान भुमरे यांनी केले आहे. 

याबाबत श्री. भुमर म्हणाले, की शासनाच्या सोशल डिस्टन्सिंग विषयक निर्देशाचे पालन करत महात्मा गांधी राष्ट्रीय रोजगार हमीच्या कामांना मान्यता दिली आहे. त्यामुळे जलसंधारण, सिंचन विहिरी, पशूंसाठी गोठ्यांचे बांधकाम, फलोत्पादन आदी वैयक्तिक स्वरूपाच्या कामांसोबतच शेतीला जोडणारे रस्ते, जलसंधारण, नाला सरळीकरण, सामुहिक विहिरी, वृक्षारोपणाची पूर्वतयारी तसेच ग्रामीण भागातील रस्त्यांची कामे सुलभ होणार आहे. 

राज्यातील सर्व गावांत गावनिहाय मंजूर करण्यात आलेल्या कामांचे नियोजन करून त्यानुसार प्रत्यक्ष कामे सुरु करण्याच्या सूचना जिल्हास्तरावर रोजगार हमी योजनेचे उपजिल्हाधिकारी व जिल्हा परिषदेचे उपमुख्य कार्यकारी अधिकारी यांना देण्यात आले आहे. लाभार्थ्यांना काही समस्या असेल तर आयुक्त (मनरेगा), सचिव (रोहयो) किंवा व्यक्तिशः संपर्क साधावा असेही मंत्री भुमरे यांनी सांगितले. 

‘कामांच्या ठिकाणी खबरदारी घ्यावी’  श्री. भुमरे यांनी ‘कोरोना’च्या पार्श्वभूमीवर मनरेगाच्या कामाच्या ठिकाणी प्रत्येकाने मास्क वापरावे, सामाजिक अंतराचे पालन करावे. सॅनिटायझरचा वापर करावा. हात साबणाने स्वच्छ धुवून घ्यावे. सर्दी, ताप, खोकला अशी काही लक्षणे दिसत असतील तर तत्काळ डॉक्टरकडे जावे. याबाबत दक्ष राहण्याच्या सूचनाही केल्या आहेत.