नांदेड, परभणी, हिंगोलीत करडईचा पेरा घटला

नांदेड  ः नांदेड, परभणी, हिंगोली या जिल्ह्यांमध्ये यंदाच्या (२०१९) रब्बी हंगामात प्रमुख तेलबिया पीक असलेल्या करडईची ४५१४ हेक्टरवर पेरणी झाली आहे. करडईच्या क्षेत्रात गतवर्षीच्या तुलनेत यंदा थोडी वाढ झाली असली, तरी सर्वसाधारण क्षेत्राच्या तुलनेत घट झाल्याची माहिती कृषी विभागाच्या सूत्रांनी दिली.

रब्बी हंगामातील कोरडवाहू क्षेत्रातील प्रमुख गळीत धान्य पीक असलेल्या करडईचे नांदेड, परभणी, हिंगोली या तीन जिल्ह्यांत सर्वसाधारण क्षेत्र ४८ हजार १६३ हेक्टर आहे. यंदा आॅक्टोबर महिन्यात झालेल्या पावसामुळे जमिनीत पेरणीसाठी ओलावा होता. परंतु पेरणीची वेळ निघून गेल्यामुळे करडईच्या क्षेत्रात घट झाली. काही वर्षांपूर्वी या जिल्ह्यांमधील जिरायती क्षेत्रातील शेतकरी रब्बी ज्वारीमध्ये आंतरपीक तसेच सलग पीक म्हणून करडईची पेरणी करत असत. परंतु गेल्या काही वर्षांत या जिल्ह्यांमध्ये सोयाबीनच्या क्षेत्रात वाढ झाली आहे. सोयाबीननंतर शेतकरी रब्बीमध्ये हरभऱ्याला पसंती देत आहेत. त्यामुळे करडई सोबतच सूर्यफूल,जवस आदी रब्बी हंगामातील तेलवर्गीय पिकांच्या क्षेत्रात घट झाली आहे. गतवर्षी (२०१८-१९) करडईची ३५६९ हेक्टरवर (९.७१ टक्के) पेरणी झाली होती.

नांदेड जिल्ह्यात करडईचे सर्वसाधारण क्षेत्र ४७६८ हेक्टर असून, यंदा १८८८ हेक्टरवर पेरणी झाली. परभणी जिल्ह्यात करडईचे सर्वसाधारण क्षेत्र २५ हजार ७८८ हेक्टर आहे. गतवर्षी २ हजार ७४३ हेक्टरवर पेरणी झाली होती. परंतु यंदा सर्व तालुक्यात कमी अधिक प्रमाणात पेरणी झाली आहे. करडईच्या एकूण पेरणी क्षेत्रात गतवर्षीच्या तुलनेत घट झाली आहे. हिंगोली जिल्ह्यांमध्ये करडईचे सर्वसाधारण क्षेत्र १८१८६ हेक्टर आहे. काही वर्षांपूर्वी औंढा नागनाथ तालुक्यातील शिरड शहापूर तसेच परिसरातील शेतकरी करडईचे मोठ्या प्रमाणावर उत्पादन घेत असत. गतवर्षी करडईची १७० हेक्टरवर पेरणी झाली. परंतु यंदा मात्र तुरळक ठिकाणी करडईची पेरणी झाली आहे. मात्र त्याची कृषी विभागाकडे नोंद नाही.