संग्रहित छायाचित्र
संग्रहित छायाचित्र

सातारा जिल्ह्यात खरिपाची तयारी सुरू

खरीप हंगामासाठी खते, बियाण्यांची मागणी करण्यात आली आहे. सोयाबीन बियाणे प्रत्येक वर्षी नवीन खरेदी न करता घरातील बियाणे वापरावे. तसेच या बियाण्याची उगवण क्षमता तपासून पेरणी केली जावी. तसेच निविष्ठांचा काळा बाजार होऊ नये यासाठी १२ भरारी पथकेही सज्ज आहेत - विनायक पवार, कृषी विकास अधिकारी, सातारा.

सातारा -ः खरीप हंगाम अवघ्या एका महिन्यावर येऊन ठेपल्याने कृषी विभागाने हंगामाची तयारी सुरू केली आहे. खरिपातील पेरणीसाठी ४७ हजार ८०४ क्विंटल बियाण्यांची मागणी करण्यात आली आहेत. तसेच एक लाख ३० हजार टन खतांची मागणी कृषी आयुक्तालयाकडे करण्यात आली असल्याची माहिती कृषी विभागाच्या सूत्रांनी दिली.

जिल्ह्यातील खरीप हंगाम यशस्वी करण्यासाठी कृषी विभागाकडून प्रयत्न सुरू झाले आहे. खरिपात तीन लाख ३५ हजार हेक्टर क्षेत्रावर पेरणी होण्याचा अंदाज आहे. यासाठी लागणारे बियाणे व खतांची मागणी करण्यात आली आहे. तीन लाख ३५ हजार क्षेत्रासाठी ४७ हजार ८०४ क्विंटल बियाण्यांची गरज निश्चित करण्यात आली आहे. त्यानुसार विविध कंपन्यांकडे बियाण्यांची मागणी नोंदविण्यात आली आहे. त्यातील भात, मका, सोयाबीन या पिकांचे दोन हजार ४०९ क्विंटल बियाणे सेवा केंद्रांकडे उपलब्ध झाले असून उर्वरित बियाणे लवकरच उपलब्ध केले जाणार आहे. कोरोनाच्या पार्श्वभूमीवर बियाण्यांची कमरतता भासणार नाही यासाठी सुक्ष्म नियोजन करण्यात आले आहे.

जिल्ह्यात या हंगामात सोयाबीन पिकाकडे शेतकऱ्यांचा कल राहण्याची शक्यता आहे. जिल्ह्यात सोयाबीनची ७५ हजार हेक्टर क्षेत्रावर पेरणी होण्याचा अंदाज गृहीत धरून १७ हजार ६३ क्विंटल सोयाबीन बियाण्याची मागणी करण्यात आली आहे. शेतकऱ्यांनी सोयाबीनचे बियाणे दरवर्षी खरेदी न करता घरच्याच बियाण्याचा वापर करण्याचे आवाहन कृषी विभागाने केले आहे.

तसेच हंगामासाठी एक लाख ३० हजार टन खतांची मागणी कृषी आयुक्तालयाकडे करण्यात आली आहे. यामध्ये युरिआ, डिएपी, एमओपी, एसएसपी, एनपीके खतांचा समावेश आहे. कृषी आयुक्तालयाकडून जिल्ह्यासाठी एक लाख दोन हजार ९२३ टन रासायिनक खतांचा पुरवठा मंजूर करण्यात आला आहे. तसेच जिल्ह्यात सध्या ४१ हजार ९० टन खते उपलब्ध आहेत.   जिल्ह्यात १२ भरारी पथके शेतकऱ्यांना गुणवत्तायुक्त कृषी निविष्ठा उपलब्ध होण्यासाठी प्रत्येक तालुक्याकरिता एक व जिल्हास्तरावर एक अशी एकूण १२ भरारी पथके स्थापन करण्यात आली आहेत. या भरारी पथकांमार्फत कृषी सेवा केंद्रांच्या अचानक तपासण्या करण्यात येणार आहेत. तपासणीत अनियमतात किंवा काळाबाजार आढळल्यास परवाने रद्द करण्यात येणार आहेत.    

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com