नगर जिल्ह्यात सततच्या पावसाने मुगाचे नुकसान

नगर  ः नगर जिल्ह्यात गेल्या काही दिवसापासून सतत पाऊस पडत आहे. त्यामुळे मुगाचे पीक पिवळे पडू लागले असून काही प्रमाणात रोगाचाही प्रादुर्भाव झाला आहे. त्यामुळे मूग उत्पादक शेतकरी हवालदिल झाले आहेत. यंदा नगर जिल्ह्यात ६० हजार ५०० हेक्टर क्षेत्रावर मुगाची पेरणी झाली आहे. 

जिल्ह्यात यंदा लवकर पाऊस पडला असल्याने मुगाच्या क्षेत्रात मोठी वाढ झाली आहे.आत्तापर्यंत सुमारे ६० हजार ५९८ हेक्टर क्षेत्रावर  मुगाची पेरणी झाली आहे. नगर तालुक्यात १९ हजार ५७३, पारनेर तालुक्यात २२ हजार १७७ हेक्टर क्षेत्रावर मुगाची पेरणी झाली आहे. कर्जत तालुक्यातही बऱ्यापैकी मुगाचे क्षेत्र आहे. हे पीकही जोमात होते.

सुमारे दोन ते अडीच फुटांपेक्षा अधिक पिकाची उंची वाढली आहे. मात्र गेली आठ दिवसांत वारंवार झालेला पाऊस, ढगाळ हवामान आणि  ऊन न पडल्याने मुगाचे पीक पिवळे पडले आहे. तसेच त्यास निघालेल्या शेगांही अतिशय लहान आकाराच्या आहेत. याशिवाय त्या वाकड्या झाल्या आहेत. आधीच वेगवेगळ्या कारणाने शेतकरी संकटात असताना आता जोमात आलेले मुगाचे पीकही संकटात असल्याने शेतकरी हवालदिल झाले आहेत.  सध्या मुग पिकावर रोगाचा प्रादुर्भाव दिसून येत असून, रोगाची लक्षणे तपासून शेतकऱ्यांनी शिफारशीनुसार फवारणी करावी, असे पारनेरचे तालुका कृषी अधिकारी रामदास दरेकर यांनी सांगितले.