अमरावती, नागपुरातील संत्रा उत्पादक झाले टेक्‍नोसॅव्ही

अमरावती  ः लॉकडाउनमुळे संत्रा उत्पादक आणि तज्ज्ञांमध्ये संवाद होऊ शकत नाही. ही बाब लक्षात घेत रिलायन्स फाउंडेशन आणि डॉ. पंजाबराव देशमुख कृषी विद्यापीठ यांच्या सहकार्याने व्हिडिओ कॉन्फरन्सिंगच्या माध्यमातून शेतकरी आणि तज्ज्ञांमध्ये दुवा साधण्यात आला. शेतकऱ्यांनी संत्रा उत्पादनासंदर्भातील आपले प्रश्‍न मांडले तर तज्ज्ञांनी त्यांचे निरसन केले.

अमरावती व नागपूर परिसरातील शेतकरी आंबिया बहारातील संत्रा फळांचे व्यवस्थापन शेतकरी करीत आहेत. उन्हाची तीव्रता वाढती असल्याने फळगळीचा सामना त्यांना करावा लागतो. अशावेळी तज्ज्ञांकडून मार्गदर्शन मिळावे अशी अपेक्षा शेतकऱ्यांची असते. कोरोनाचा संसर्ग टाळण्यासाठी सद्यःस्थितीत लॉकडाउन जाहीर करण्यात आले आहे. त्यामुळे मार्गदर्शन विषयक कामांतही मर्यादा आल्या आहेत. रिलायन्स फाउंडेशन व डॉ. पंजाबराव देशमुख कृषी विद्यापीठाने यावर पर्याय म्हणून व्हिडिओ कॉन्फरन्सिंगच्या माध्यमातून शेतकरी, शास्त्रज्ञ संवाद घडवून आणला.

विद्यापीठाचे शास्त्रज्ञ डॉ. दिनेश पैठणकर, सहायक प्राध्यापक वनस्पती रोगशास्त्र डॉ. योगेश इंगळे, अमरावतीचे कृषी सहसंचालक अनिल खर्चान यांनी शेतकऱ्यांच्या प्रश्‍नांना उत्तरे दिली. या कॉन्फरन्समध्ये ३५ गावातील ४४ शेतकरी सहभागी झाले होते. रिलायन्स फाऊंडेशनच्या वतीने जिल्हा व्यवस्थापक विलास सवाणे तसेच सहायक सुमित काळे यांनी समन्वयक म्हणून काम पाहिले.