पाटणमध्ये वादळी पावसामुळे झालेल्या नुकसानीचे पंचनामे करा : गृह राज्यमंत्री शंभुराज देसाई

सातारा : पाटण तालुक्यात २९ एप्रिलला मोठ्या प्रमाणात झालेल्या वादळी पावसामुळे डोंगरपठारासह सखल भागातील गावांमधील घरांचे मोठ्या प्रमाणात नुकसान झाले. त्याचबरोबर पिके आणि फळबागांचेही नुकसान झाले आहे. या नुकसानीचे तत्काळ पंचनामे करून नुकसानग्रस्तांना मदत मिळण्यासाठी शासनाकडे अहवाल सादर करावा, अशा सूचना गृहराज्यमंत्री शंभुराज देसाई यांनी पाटणचे प्रातांधिकारी, तहसीलदार व कृषी विभागाला दिल्या. 

गृह राज्यमंत्री देसाई यांनी तारळे परिसरात वादळी पावसाने नुकसान झालेल्या गावांना भेटी देत झालेल्या नुकसानीची पाहणी केली. नुकसानग्रस्तांना तातडीने मदत मिळवून देण्यासाठी प्रयत्नशील असल्याचे सांगून त्यांनी नुकसानग्रस्तांना दिलासा दिला. ‘कोरोना’च्या संकटामुळे संचारबंदीच्या काळात हैराण झालेल्या पाटण तालुक्यातील जनतेला २९ एप्रिलला झालेल्या वादळी पावसामुळे मोठा फटका बसला. मंत्री देसाई यांच्या सूचनेवरून पाटण तालुक्यातील महसूल व कृषी विभागाकडून वादळी पावसामुळे नुकसान झालेल्या नुकसानीची तत्काळ पाहणी करून पंचनामे करण्याच्या प्रक्रियेस सुरुवात करण्यात आली आहे.