पोलिसांच्या हस्तक्षेपामुळे खडकी उपबाजार बंद

पुणे  ः ‘कोरोना’च्या पार्श्वभूमीवर लॉकडाउनमध्ये शहरातील फळे, भाजीपाल्याचा पुरवठा सुरळीत होण्यासाठीच्या उपाययोजनांमध्ये पोलिस हस्तक्षेप करीत आहेत. विविध अडचणींचा मुकाबला करीत पुणे बाजार समिती प्रशासनाने मुख्य बाजार वगळता ४ उपबाजार सुरु करण्याचा निर्णय घेतला. मात्र शुक्रवारी (ता.१७) खडकी येथील उपबाजार आवार बंद करण्याचे आदेश स्थानिक पोलीस प्रशासनाने दिल्याने बाजार बंद करण्यात आला आहे.

‘कोरोना’च्या पार्श्वभूमीवर लॉकडाउनमध्ये बाजार समित्या बंद असल्याने शेतकऱ्यांचा शेतीमाल बाजारात पडून राहत असल्याने त्यांना मोठ्या आर्थिक नुकसानीला सामोरे जावे लागत आहे. शहरातील फळे, भाजीपाला टंचाईमुळे दर वाढले आहेत. यातून ग्राहकांची देखील लूट सुरु झाली आहे. त्यातच गुलटेकडी परिसर संवेदनशील भाग झाल्याने, उपबाजार सुरु करण्याचा निर्णय पोलीस, महसूल आणि बाजार समितीने घेतला. त्यानुसार गुरुवारी (ता.१६) मांजरी, मोशी, उत्तमनगर आणि खडकी उपबाजार सुरु करण्यात आले. गुरुवारी (ता.१६) सुमारे २५० वाहनांमधून भाजीपाल्याची आवक झाली होती. मात्र शुक्रवारी (ता.१७) स्थानिक पोलीस प्रशासनाने खडकी येथील उपबाजार बंद करण्याचे आदेश दिल्याने हा बाजार बंद ठेवण्यात आला होता.

याबाबत बाजार समिती प्रशासक बी.जे.देशमुख म्हणाले, की गुरुवारी खडकी कॅंटोन्मेंट बोर्डाला पत्र देऊन खडकी उपबाजार सुरु केला होता. मात्र शुक्रवारी स्थानिक पोलीस प्रशासनाने हा उपबाजार बंद करण्याचे आदेश दिल्याने तो बंद होता. यासाठी वरिष्ठ पोलीस अधिकाऱ्यांशी समन्वय साधत, बाजार आवार सुरु करण्यासाठी प्रयत्नशील आहे.