अकोला जिल्ह्यात ८७ हजार हेक्टरवर हरभरा लागवडीची शक्यता

अकोला  ः यंदा समाधानकारक पावसामुळे सर्वच प्रकल्प तुडुंब भरले असल्याने रब्बी हंगामात गहू, हरभरा या पिकांची लवकरच लागवड सुरू होणार आहे. कृषी विभागाने यावर्षी १ लाख २३ हजार ६२० हेक्टरवर रब्बी पेरणीचे नियोजन केले असून, यात ८७ हजार हेक्टरवर हरभऱ्याची लागवड होण्याची शक्यता गृहीत धरण्यात आली आहे. 

जिल्ह्यात रब्बीचे सरासरी क्षेत्र १ लाख १५ हजार ४६६ हेक्टर आहे. यंदा सरासरी लागवड क्षेत्रात वाढ होऊन ते १ लाख २३ हजार ६२० हेक्टरपर्यंत राहू शकते. सततच्या पावसाने खरिपातील पिकांचे नुकसानही झाले आहे. ही मरगळ झटकून शेतकरी आता रब्बीच्या तयारीला लवकरच सुरुवात करणार आहे. या आठवड्यात सोयाबीन काढणीला सार्वत्रिक स्वरूपात सुरुवात होत असून १५ दिवसात हा हंगाम बऱ्यापैकी पूर्ण होऊ शकतो. त्यानंतर सध्या उपलब्ध असलेल्या जमिनीतील ओलीचा फायदा घेत शेतकरी हरभरा लागवडीकडे वळणार आहेत.

कृषी खात्याच्या नियोजनानुसार जिल्ह्यात ८७ हजार हेक्टरवर हरभऱ्याची लागवड अपेक्षित आहे. गव्हाची २८ हजार हेक्टरवर लागवड होईल. १०० हेक्टरवर करडईचेही नियोजन केले आहे. सोबतच ५०० हेक्टरवर मक्याची लागवड अपेक्षित आहे. रब्बीसाठी सुमारे ६५ हजार क्विंटल बियाणे लागणार आहे. यापैकी महाबीजकडे ३५ हजार क्विंटल बियाण्यांची मागणी करण्यात आली आहे.     रब्बी पीकनिहाय नियोजित क्षेत्र (हेक्टर)