शेतीला दिवसा बारा तास वीज द्या : राजू शेट्टी

कोल्हापूर  : ‘कोरोना’च्या पार्श्वभूमीवर सध्या देशभर लॉकडाउन करण्यात आले आहे. औद्योगिक वीज वापरही बंद असल्याने शेतीला दिवसा बारा तास वीज पुरवठा करण्यात यावा. सध्या शेतकरी लॉकडाउनमुळे आर्थिक संकटात आहेत. त्यांना उभारी देण्यासाठी सरकारने हा निर्णय घेऊन दिलासा द्यावा, अशी मागणी स्वाभिमानी शेतकरी संघटनेचे अध्यक्ष, माजी खासदार राजू शेट्टी यांनी ऊर्जामंत्री नितीन राऊत यांच्याकडे केली. 

गेल्या सोळा दिवसांपासून संपूर्ण देशात लॉकडाउन करण्यात आले आहे. सर्व उद्योगधंदे, व्यापार, कॉर्पोरेट कार्यालये, औद्योगिक वसाहती पूर्णपणे बंद ठेवण्यात आल्या आहेत. सध्या शेतीला तीन दिवस दिवसा व चार दिवस रात्री असा वीज पुरवठा केला जात आहे. कडक उन्हाळा सुरु असल्याने पिकांना वेळेवर पाणी देण्याची गरज आहे. शेती पिकली तरच देशातील १३७ कोटी जनतेला अन्नधान्य मिळणार आहे. मात्र पिकांना रात्री पाणी देणे शेतकऱ्यांना जिकिरीचे होत आहे. त्यामुळे सध्या विजेची बचत होत असून किमान याकाळात तरी शेतीला दिवसा बारा तास वीज पुरवठा करण्यात यावा.

जेणेकरून लॉकडाउनच्या काळात देशातील जनतेला चांगल्या प्रतीचे अन्नधान्य, भाजीपाला मिळेल. महापुराने कोल्हापूर, सांगली जिल्ह्यासह राज्यातील अनेक जिल्ह्यांतील शेतकऱ्यांचे कोट्यवधी रुपयांचे नुकसान झाले आहे. शेती आणि घरांचे पंचनामा करण्यात आले असले तरी अद्याप नुकसानग्रस्त शेतकऱ्यांना मदत मिळालेली नाही. असे असताना ‘कोरोना’च्या पार्श्वभूमीवर भाजीपाला, द्राक्ष, फळे तसेच अन्नधान्याचे मोठे नुकसान होत आहे. त्यामुळे शेतकऱ्यांना दिवसा बारा तास वीज पुरवठा करून दिलासा द्यावा. लॉकडाऊनच्या काळात बचत झालेली वीज शेतकऱ्यांना द्यावी, अशी मागणी श्री. शेट्टी यांनी केली आहे.