पुणे जिल्ह्यातील १४०० सरपंचांच्या निवडीचा मार्ग मोकळा

पुणे  ः सरकारने राज्यातील ग्रामपंचयातींमध्ये सरपंच आणि उपसरपंच पदांच्या रिक्त जागांची निवड प्रक्रिया राबविण्याचे आदेश दिले आहेत. त्यानुसार पुणे जिल्ह्यातील सुमारे १४०० सरपंचांच्या निवडीचा मार्ग मोकळा झाला आहे.

राज्य निवडणूक आयोगाने १७ मार्चला सरपंच निवडीच्या प्रक्रियेला स्थगिती दिली होती. त्यापूर्वी जिल्ह्यातील अनेक ग्रामपंचायतींनी सरपंच आणि उपसरपंच यांचे राजीनामे घेऊन नवीन निवडीबाबतचे प्रस्ताव जिल्हाधिकाऱ्यांकडे पाठविले. आता राज्य सरकारने ग्रामपंचायतींच्या बैठका घेऊन निवड प्रक्रिया राबविण्याचे आदेश दिले आहेत. त्यानुसार पुणे जिल्ह्यातील एक हजार ४०० सरपंचाची निवड प्रक्रिया लवकरच होण्याची शक्यता आहे.

जिल्हयातील १४०० ग्रामपंचायतीच्या सरपंच पदासाठी आरक्षण सोडत २७ मार्चला काढण्यात येणार होती. मात्र, आता ही प्रक्रिया राबवून जिल्ह्यातील सरपंच पदांच्या निवडी होणार आहेत.

सरपंचपदासाठी आरक्षण सोडत, ७५० ग्रामपंचायतींच्या प्रभाग रचनेचा कार्यक्रम आणि सहा ग्रामपंचायतीसाठी मार्च अखेरीस होणारी निवडणूक प्रक्रिया स्थगित करण्याचे आदेश जिल्हाधिकारी नवलकिशोर राम यांनी यापूर्वी दिले होते. आता राज्य सरकारच्या निर्णयानुसार सरपंच पदांच्या निवडीची प्रक्रिया राबविण्यात येणार असल्याचे जिल्हा प्रशासनाच्या सुत्रांनी सांगितले.

पुणे जिल्ह्यातील बारामती तालुक्यातील मुर्टी, मोराळवाडी, खराडेवाडी, पुरंदर तालुक्यातील आस्करवाडी आणि भिवरी, दौंड तालुक्यातील बिरोबावाडी अशा सहा ग्रामपंचायतींची मुदत एप्रिल ते जून या महिन्यांमध्ये संपणार आहे. या निवडणुकांसाठी २९ मार्चला मतदान, ३० मार्चला मतमोजणी आणि निकाल जाहिर करण्याचा कार्यक्रम प्रशासनाने आखला होता. त्यामुळे आता ही सर्व प्रक्रिया प्रशासनाला नव्याने राबवावी लागणार आहे.