हिंगणी बुद्रूक, कपिलेश्‍वर येथे माती नमुने घेण्यासाठी विशेष मोहीम

अकोला  ः आगामी खरीप हंगामाच्या दृष्टीने मृदा आरोग्य पत्रिकेअंतर्गत माती नमुने घेण्यासाठी हिंगणी बुद्रूक, कपिलेश्‍वर येथे विशेष मोहीम राबविण्यात आली. ‘कोरोना’च्या पार्श्‍वभूमीवर सोशल डिस्टन्सचे पालन करीत हिंगणी बुद्रूकचे कृषी सहायक एन. जी. घाटोळ तर कपिलेश्‍वर येथील कृषी सहायक ए. एन. वानखडे यांच्यासह कृषी सहायक अनंत देशमुख, धर्मेंद्र राठोड, मंगेश पवार, चंदा बोळे, उषा सुलताने, दिपाली अटबर यांनी माती नमुने घेत तपासणीसाठी पाठविले.

जमिनीचे आरोग्य अबाधित राखण्यासाठी मृदा तपासणीवर आधारीत खतांच्या संतुलित तसेच कार्यक्षम वापरास अनन्यसाधारण महत्त्व प्राप्त झाले आहे. केंद्र व राज्य शासनाच्या पुढाकाराने राज्यात शाश्‍वत शेती अभियानाअंतर्गत मृदा आरोग्य पत्रिका ही योजना सुरु असून आहे. या योजनेत बदल करून राज्यातील प्रत्येक तालुक्यातील पाच गावे निवडून त्यातील वहितीखालील संपूर्ण शेत जमिनीतील माती नमुन्यांची तपासणी करून गावातील शेतकऱ्यांना आरोग्य पत्रिका वितरणाचा पथदर्शी प्रकल्प राबविणे हा योजनेचा मुख्य उद्देश आहे.

मृदा तपासणीवर आधारित अन्नद्रव्यांच्या कमतरतेनुसार खतांच्या संतुलित वापरास प्रोत्साहन देणे, मृदा आरोग्य सुधारण्यासाठी जैविक खते, सेंद्रिय खतांच्या वापरास प्रोत्साहन देणे आदी उद्देश योजनेचे आहेत. या आधारे हिंगणी, कपिलेश्‍वर गावांची निवड करण्यात आली. हिंगणी बुद्रूक येथे ४८९ तर कपिलेश्‍वर येथे ४२९ माती नमुने घेण्याची प्रक्रिया नुकतीच पार पाडली. जिल्हा परिषद सदस्य गोपाल दातकर यांच्या उपस्थितीत अमित दातकर, रितेश ढवळी, गणेश चाकोते, अंकुश चाकोते, नितीन चाकोते यांनी यासाठी सहकार्य केले.