सोयाबीन बियाण्यांबाबत साताऱ्यात ३५ तक्रारी 

सातारा  : खरिपातील सोयाबीन बियाण्यांची उगवण न झाल्यामुळे सातारा जिल्ह्यातील शेतकरी अडचणीत आले आहेत. जिल्ह्यात याबाबत ३५ शेतकऱ्यांनी कृषी विभागाकडे तक्रारी दाखल केल्या आहेत. दिवसेंदिवस तक्रारींची संख्या वाढत असून, निकृष्ट बियाणे देणाऱ्या कंपन्यांवर कारवाई करावी, अशी मागणी शेतकऱ्यांकडून केली जात आहे. 

जिल्ह्यात महाबळेश्वर तालुक्याचा अपवाद वगळता इतर सर्व तालुक्यांत सोयाबीन पीक घेतले जाते. सातारा, पाटण, कराड, वाई, कोरेगाव, खटाव या तालुक्यांमध्ये सोयाबीनचे क्षेत्र सर्वाधिक आहे. निसर्ग चक्रीवादळामुळे १ जूनच्यादरम्यान दुष्काळग्रस्त तालुक्यांसह अनेक ठिकाणी दमदार पावसाने हजेरी लावली. यामुळे शेतकऱ्यांनी जूनच्या पहिल्या सप्ताहापासून पेरणीची कामे सुरू केली. या पेरणी क्षेत्रात सोयाबीन, बाजरी, ज्वारी या पिकांचा समावेश आहे. मात्र अनेक ठिकाणी सोयाबीन बियाण्यांची उगवण झाली नसल्याचे दिसून आले. उपलब्ध झालेल्या बियाण्यांमध्ये काही प्रमाणात निकृष्ट बियाणे आल्याचे बोलले जाते.

याबाबत कृषी विभागाकडे ३५ शेतकऱ्यांच्या तक्रारी आल्या आहेत. सोयाबीनचे पेरणी क्षेत्र मोठे असल्याने बियाणे उगवण न झालेल्या क्षेत्रात वाढ होण्याची शक्यता आहे. जिल्ह्यात खरिपात १७ हजार क्विंटल सोयाबीन बियाण्यांची मागणी करण्यात आली होती. यापैकी १६ हजार ५७२ क्विंटल बियाणे उपलब्ध झाले. यातील १४ हजार ८७३ क्विंटल सोयाबीन बियाण्यांची विक्री झाली. सध्या ६६.५१ टक्के क्षेत्रावर पेरण्यांची कामे पूर्ण झाली आहेत. जिल्ह्यात बियाणे खरेदीचा विचार करता, उर्वरित ३४ टक्क्यांपेक्षा जास्त क्षेत्रावर सोयाबीन लागवडीची शक्यता आहे. यामुळे लागवडीनंतरच निकृष्ट बियाणे किती होते, याचा अंदाज येणार आहे. मात्र यामुळे शेतकऱ्यांचे मोठे नुकसान होणार आहे.   दुबार पेरणीचे संकट खरिपातील सोयाबीन हे दसरा व दिवाळी सणाच्या दृष्टीने फायदेशीर ठरते. मात्र यंदा उगवण न झालेल्या सोयाबीनच्या क्षेत्रात दुबार पेरणीचे संकट उभे राहिले आहे. या शेतकऱ्यांना त्वरित मदतीच्या दृष्टीने दर्जेदार बियाणे उपलब्ध करून देणे गरजेचे आहे. यातून शेतकऱ्यांना दुबार पेरणी करणे शक्य होणार आहे. पहिल्या पेरणीचा खर्च वाया जाणार असला, तरी किमान उत्पादन मिळणे शक्य होणार आहे.