खानदेशात सरासरीच्या २१ टक्के पाऊस

जळगाव  ः खानदेशात पावसाचे प्रमाण कमी अधिक आहे. परंतु काही भागात जोरदार पाऊस झाला असून, नाले, नद्यांना चांगले प्रवाही पाणी आले आहे. एकूण सरासरीच्या २१ टक्के पाऊस खानदेशात झाला आहे. 

जळगाव जिल्ह्यात जूनमधील एकूण सरासरीच्या ७० टक्के पाऊस झाला आहे. तर धुळ्यातही जूनमधील सरासरीच्या ६५ टक्‍क्‍यांवर पाऊस झाला आहे. धुळ्यात एकूण ९६५ मिलिमीटर, जळगावात ७६५ मिलिमीटर आणि नंदुरबारात सुमारे ११०० मिलिमीटर पाऊस पडतो. जूनच्या दुसऱ्या आठवड्यात खानदेशात अपवाद वगळता सर्वत्र पाऊस झाला. पेरणी वेगात सुरू झाली. परंतु १४ ते २४ जून असा १० दिवस पावसाचा खंड होता. रोज ऊन तापत होते. उष्णतेत पिकांचे कोवळे कोंब होरपळत होते. परंतु अनेक भागात २५ व २६ जून रोजी पावसाने  हजेरी लावली.

खानदेशात धुळ्यातील साक्री, शिंदखेडा, धुळे, शिरपूर येथे बऱ्यापैकी पाऊस झाला आहे. तर जळगाव जिल्ह्यात पारोळा, एरंडोल, जळगाव, धरणगाव, चोपडा, पाचोरा भागात पाऊस बऱ्यापैकी आहे. रावेर, यावल, बोदवड, चाळीसगाव भागात पाऊस कमी आहे. पारोळा तालुक्‍यात अनेक भागात जोरदार पावसामुळे शिवारातील नाले वाहू लागले आहेत. पिकांना चांगले जीवदान मिळाले आहे.   पेरणीला पुन्हा आला वेग खानदेशात मागील तीन-चार दिवसांत कमी अधिक पाऊस झाला आहे. अनेक भागात ४० मिलिमीटरर्पंत पाऊस झाल्याने पेरणी सुरू झाली आहे. खानदेशात २५ जूनपर्यंत सुमारे ४२ टक्के क्षेत्रात पेरणी पूर्ण झाली होती. ही पेरणी मागील तीन दिवसांत सुमारे ५५ टक्‍क्‍यांपर्यंत पोचली आहे. कोरडवाहू कापूस, कडधान्य, सोयाबीन, बाजरी यांची पेरणी शेतकरी करीत आहेत.