शेतकरी अपघात विमा योजनेत कुटुंबातील दोघांना मिळणार लाभ

सोलापूर ः शासनाने शेतकऱ्यांसाठी गोपीनाथ मुंडे शेतकरी अपघात विमा योजना लागू केली आहे. या योजनेत खातेदार शेतकऱ्यांसह त्याच्या कुटुंबातील अन्य एका व्यक्तीलाही या अपघात विमा योजनेचा लाभ मिळणार असल्याची माहिती प्रभारी जिल्हा अधीक्षक कृषी अधिकारी रवींद्र माने यांनी दिली. या अपघात विमा योजनेत शेतकऱ्याच्या कुटुंबास दोन लाखांची मदत दिली जाते. 

या योजनेत यापूर्वी केवळ खातेदार शेतकऱ्याचाच समावेश होता. मात्र त्यामध्ये शासनाने दुरुस्ती करून शेतकऱ्यांसह त्याच्या कुटुंबातील एका व्यक्तीलाही याचा लाभ होणार असल्याचे जाहीर केले आहे. शेतकऱ्यांना रात्री-अपरात्री शेतामध्ये काम करत असताना अपघात होऊन मृत्यू झाल्यास त्या शेतकऱ्याच्या कुटुंबास दोन लाख रुपयांपर्यंतची मदत शासनाकडून दिली जाते. शेती व्यवसाय करताना होणारे अपघात, वीज पडणे, पूर, सर्पदंश, विंचू दंश, विजेचा शॉक बसणे इत्यादी नैसर्गिक आपत्तीमुळे होणाऱ्या अपघातांचा या योजनेमध्ये समावेश आहे.

याशिवाय रस्त्यावरील अपघात, वाहन अपघात किंवा अन्य कोणत्याही कारणामुळे शेतकऱ्यांचा अपघात झाल्यास त्याच्या कुटुंबाला ही मदत मिळते. शेतकऱ्याशिवाय त्याच्या कुटुंबातील पत्नी, मुलगा, अविवाहित मुलगी यांचाही अपघाती मृत्यू झाल्यास त्यांच्या कुटुंबाला मदत मिळते.