नगर जिल्ह्यातील धरणांमधील पाणीसाठ्यात वाढ

नगर  ः जिल्ह्यात यंदा सुरुवातीपासूनच चांगला पाऊस झाल्याने धरणांमधील पाणीसाठ्यात वाढ होत आहे.  

गेल्या वर्षी केवळ सहा टक्के पाणीसाठा असलेल्या सीना धरणात यंदा आतापर्यंत एकूण ५० टक्के म्हणजेच एकूण १.३० टीएमसी पाणीसाठा झाला. निळवंडे धरणातही आतापर्यंत एकूण ५० टक्के म्हणजे ४.४४ टीएमसी पाणीसाठा झाला आहे. अकोले तालुक्याच्या पश्चिम भागात मात्र पुरेसा पाऊस नसल्याने भंडारदरा धरणातील पाणीसाठ्यात फारशी वाढ झालेली नाही. सध्या भंडादरा धरणात एकूण ३० टक्के म्हणजेच ३.३२ टीएमसी पाणीसाठा आहे.  

नगर जिल्ह्यात भंडारदरा, निळवंडे, मुळा, सिना, खैरी, घाटशीळा, मांडओहळ हे प्रमुख प्रकल्प आहेत. यंदा जून महिन्यातच चांगला पाऊस सुरु झाल्याने धरणांतील पाणीसाठा वाढत आहेत. नगर व पारनेर तालुक्यात मागील आठवड्यात जोरदार पाऊस झाल्याने सीना धरणात पाण्याची आवक झाली.

सध्या धरणात एकूण ५० टक्के पाणीसाठा झाला आहे. ११ टीएमसी क्षमता असलेल्या भंडारदरा धरणात सध्या एकूण सव्वातीन टीएमसी तर निळवंडे धरणात एकूण चार टीएमसी पाणीसाठा झाला आहे. मांडओहळ मध्यम प्रकल्पात ३८ तर घाटशीळ पारगाव मध्यम प्रकल्पात दोन टक्के पाणीसाठा झाला आहे. संगमनेरमधील भोजापूर मध्यम प्रकल्पात १३ टक्के तर खैरी मध्यम प्रकल्पात २२ टक्के पाणीसाठा झाला आहे.  गेल्या चार दिवसांपासून अकोले तालुक्याच्या पश्चिम भागातील भंडारदरा धरणाच्या पाणलोट क्षेत्रात चांगला पाऊस सुरू झाला आहे. त्यामुळे भंडारदरा धरणात पाण्याची आवक चांगली सुरू झाली आहे. जिल्ह्यातील अन्य भागांत मात्र चार दिवसांपासून पाऊस थांबलेला आहे. 

मंगळवारी (ता. ७) सकाळी आठ वाजेपर्यंत पडलेला पाऊस (मिमी) ः घाटघरला १०५, रतनवाडी ९५, पांजरे ६५, वाकी ५०, भंडारदरा  ७१, निळवंडे २६.