गारठ्यात हळूहळू वाढ

पुणे  ः कोरड्या हवामानामुळे किमान तापमानात चढउतार होत आहे. पुढील दोन ते चार दिवस गारठा कायम राहणार आहे. त्यानंतर गारठ्यात हळूहळू वाढ होण्याची शक्यता आहे. रविवारी (ता. १५) सकाळी निफाड येथे १३.२ अंश सेल्सिअस अशा किमान तापमानाची नोंद झाली असल्याचे हवामान विभागाच्या सूत्रांनी सांगितले.

मध्यप्रदेश, राजस्थानमध्ये गेल्या आठवड्यात पाऊस झाल्याने किमान तापमानात वाढ झाली होती. मात्र, आता पुन्हा या भागात हवामान कोरडे झाल्याने गारठा वाढू लागला आहे. अनेक भागांत किमान तापमानात घट होऊ लागली आहे. हिमाचल प्रदेश, पूर्व राजस्थान, सौराष्ट्र, कच्छ, पश्चिम बंगाल, सिक्कीम या भागात सरासरीच्या तुलनेत एक ते तीन अंश सेल्सिअसने किमान तापमानात घट झाली आहे. राजस्थानाच्या पूर्व भागातील सिकर आणि पिलानी येथे ५.५ अंश सेल्सिअस अशा सर्वात कमी किमान तापमानाची नोंद झाली आहे.

राज्यात गेल्या दोन ते तीन दिवसांपासून हवामान कोरडे आहे. त्यामुळे सकाळपासून ऊन पडत असले तरी सायंकाळनंतर हवेत चांगलाच गारवा जाणवत आहे. कोकणातील बहुतांशी भागात किमान तापमान १८ ते २० अंश सेल्सिअसच्या दरम्यान होते.

मध्य महाराष्ट्रातील पुणे, महाबळेश्वर या भागांत किंचित थंडी असली तरी सोलापूर, सांगली या भागांत थंडी कमी होती. खानदेशातही गारठा असल्याने किमान तापमान १५ अंश सेल्सिअसच्या दरम्यान होते. मराठवाडा व विदर्भात थंडी कमी अधिक प्रमाणात होती.

रविवारी (ता. १५) सकाळी आठ वाजेपर्यंतच्या चोवीस तासांतील विविध ठिकाणचे किमान तापमान, अंश सेल्सिअसमध्ये, कंसात वाढ, घट ः अकोला १७.३ (४), अलिबाग १९.१, अमरावती १८.४ (३), औरंगाबाद १६.३ (४), बुलडाणा १७.० (२), चंद्रपूर १८.६ (५), डहाणू १९.४ (१), गोंदिया १७.५ (५), जळगाव १५.६ (४), कोल्हापूर १८.५ (३), महाबळेश्वर १४.४(१), मालेगाव १५.५ (४), मुंबई १८.०(-१), नागपूर १६.८ (४), नांदेड १६.० (३), नाशिक १४.० (३), निफाड १३.२, नवी मुंबई (पनवेल) १५.७, उस्मानाबाद १३.८, परभणी १७.८ (४), लोहगाव १६.६ (४), पाषाण १५.६ (४), पुणे १५.२ (४), रत्नागिरी २०.१, सांगली १८.३ (३),  सातारा १५.८ (३), सोलापूर २०.२ (४), वर्धा १८.४ (५), यवतमाळ १६.४ (२).