कोकणात जोरदार पावसाची शक्यता 

पुणे : पावसाला पोषक हवामान असल्याने गेल्या काही दिवसांपासून कोकणात पावसाने जोर धरला आहे. घाटमाथा आणि मध्य महाराष्ट्रातील धरणांच्या पाणलोट क्षेत्राही संततधार पाऊस सुरू आहे. आज (ता. ९) कोकण, घाटमाथ्यावर तुरळक ठिकाणी जोरदार पावसाची शक्यता आहे; तर उर्वरित महाराष्ट्रात हलक्या ते मध्यम पावसाचा अंदाज हवामान विभागाने वर्तविला आहे. 

गुजरातमधील कच्छच्या आखातालगत हवेचे कमी दाबाचे क्षेत्र आहे. मॉन्सूनचा आस असलेला कमी दाबाचा पट्टा या प्रणालीच्या केंद्रापासून पश्चिम बंगालपर्यंत विस्तारला आहे. पश्चिम किनाऱ्याला समांतर असलेल्या हवेच्या कमी दाबाच्या पट्ट्याचा विस्तार कमी होत, कर्नाटकपासून लक्षद्वीपर्यंत सक्रिय आहे. ही स्थिती पोषक ठरल्याने कोकण, घाटमाथ्यावर पावसाची संततधार कायम राहणार आहे; तर उर्वरित राज्यात ढगाळ हवामानासह हलक्या ते मध्यम सरी पडण्याची शक्यता आहे. 

आज (ता. ८) कोकणातील सिंधुदुर्ग, रत्नागिरी, रायगड जिल्ह्यात पावसाचा जोर राहणार आहे. मुंबईसह ठाणे, पालघर जिल्ह्यात अनेक ठिकाणी अधून मधून पावसाच्या सरी सुरूच राहणार आहेत. मध्य महाराष्ट्र, मराठवाडा, विदर्भातही तुरळक ठिकाणी पाऊस पडण्याचा अंदाज हवामान विभागाने वर्तविला आहे.