पुणे विभागात गव्हाचा १ लाख ६८ हजार हेक्टरवर पेरा

पुणे  ः पुणे विभागात गव्हाच्या पेरण्या उरकल्या असून, अनेक ठिकाणी गहू पीक वाढीच्या अवस्थेत आहे. विभागात गव्हाचे सरासरी क्षेत्र एक लाख ५४ हजार ८४२ हेक्टर असून, त्यापैकी एक लाख ६८ हजार ७७० हेक्टरवर म्हणजेच १०९ टक्के क्षेत्रावर पेरणी झाली आहे. यंदा उशिरा पोषक हवामान तयार झाले. त्यानंतर विभागात गव्हाच्या पेरण्यांना चांगला वेग आला होता, असे कृषी विभागाच्या सूत्रांनी सांगितले.

यंदा चांगल्या पावसामुळे गव्हाच्या पेरणीच्या क्षेत्रात वाढ होण्याचा अंदाज कृषी विभागाने वर्तवला होता. गव्हाच्या पेरणीस नोव्हेंबर ते डिसेंबर हा कालावधी चांगला असतो. मात्र, उशिरा पाऊस झाल्यामुळे अनेक शेतकऱ्यांनी उशिराने पेरण्या करण्यास सुरुवात केली. सध्या पीकवाढीच्या अवस्थेत आहे. काही लवकर पेरणी झालेल्या ठिकाणी गहू ओंबी निसवण्याच्या अवस्थेत आहे. पुणे जिल्ह्याचा पूर्वेकडील भाग, नगर जिल्ह्यातील उत्तरेकडील तालुके, सोलापूरातील अक्कलकोट, मंगळवेढा, दक्षिण सोलापूर हे तालुके गव्हाच्या पिकासाठी ओळखले जातात.

चालू वर्षी विभागात अक्कलकोट तालुक्यात गव्हाची सर्वाधिक पेरणी झाली आहे. नगर जिल्ह्यात सर्वाधिक ९ हजार ९८३ हेक्टरवर गव्हाची पेरणी कोपरगाव तालुक्यात झाली आहे. त्याखालोखाल नगर, श्रीरामपूर, राहुरी, संगमनेर, शेवगाव, श्रीगोंदा, राहाता या तालुक्यांत गव्हाची पेरणी झाली आहे. जामखेड तालुक्यात पाण्याची उपलब्धता अधिक नसल्याने सर्वात कमी क्षेत्रावर गव्हाची पेरणी झाली आहे. पुणे जिल्ह्यातील बारामती तालुक्यात सर्वाधिक क्षेत्रावर गव्हाची पेरणी झाली आहे. त्यापाठोपाठ जुन्नर, इंदापूर, दौंड, पुरंदर या तालुक्यांत पेरणी झाली आहे. पश्चिमेकडील मावळ, मुळशी, भोर, वेल्हा, हवेली, खेड या तालुक्यात कमी क्षेत्रावर गव्हाची पेरणी झाली आहे.

सोलापूर जिल्हयात उत्तर सोलापूर, दक्षिण सोलापूर, बार्शी या तालुक्यांत पेरणी झाली आहे. माढा, सांगोला, माळशिरस या तालुक्यांत कमी क्षेत्रावर गव्हाची पेरणी झाली आहे. यंदा झालेल्या अधिक पेरणीमुळे गव्हाच्या उत्पादनात बऱ्यापैकी वाढ होण्याची शक्यता असल्याचे कृषी विभागाच्या सूत्रांनी सांगितले.