थकीत ऊसबिलाप्रश्नी नांदेडमध्ये शेतकऱ्यांचा अधिकाऱ्यांना घेराव

नांदेड ः परभणी जिल्ह्यातील सोनपेठ तालुक्यातील महाराष्ट्र शेतकरी शुगर्स कारखान्याकडील २०१५ मध्ये गाळप केलेल्या उसाचे बिल व्याजासह शेतकऱ्यांना अदा करण्यात यावे, या मागणीसाठी मंगळवारी (ता. २८) शेतकरी संघर्ष समितीतर्फे नांदेड येथील प्रादेशिक साखर सहसंचालक कार्यालयातील अधिकाऱ्यांना घेराव घालण्यात आला.

सायखेडा येथील महाराष्ट्र शेतकरी शुगर्स साखर कारखान्याला २०१५ मध्ये  अनेक जिल्ह्यांतील शेतकऱ्यांनी दिलेल्या उसाचे सुमारे चार कोटी रुपयांवरील ऊसबिल अद्याप थकीत आहे. ऊस बिलाप्रश्नी शेतकऱ्यांनी आंदोलने केली. कारखान्यावर आरआरसीची कारवाई करूनही विक्री झाली नाही. त्यामुळे गेल्या पाच वर्षांपासून शेतकऱ्यांचे ऊस बिल थकीत आहे. शेतकऱ्यांना थकीत ऊसबिल व्याजासह तत्काळ अदा करण्यात यावे, या मागणीसाठी शेतकरी संघर्ष समितीचे कॅाम्रेड विलास बाबर, एकनाथ पौळ, ज्ञानदेव शिंदे, भीमराव शिंदे, गंगाधर रोकडे आदींनी साखर सहसंचालक कार्यालयातील अधिकाऱ्यांना घेराव घालत मागण्यांचे निवेदन दिले.