सोयाबीन बियाणेप्रश्नी परभणीत आंदोलन

परभणी  ः महाबीजच्या सोयाबीन बियाण्याची उगवण कमी झाल्यामुळे शेतकऱ्यांचे मोठे नुकसान झाले आहे. दुबार पेरणीसाठी शेतकऱ्यांना बियाणे बदलून देण्यात यावे, या मागणीसाठी स्वाभिमानी शेतकरी संघटनेतर्फे सोमवारी (ता.२९) महाबीजच्या विभागीय व्यवस्थापकांना घेराव घालण्यात आला.

जिल्ह्यातील शेतकऱ्यांनी यंदाच्या हंगामात पेरणी केलेल्या महाबीजच्या सोयाबीन बियाण्याची उगवण कमी असल्यामुळे शेतकऱ्यांचे नुकसान झाले आहे. पहिल्या पेरणीचा खर्च वाया गेल्यामुळे शेतकऱ्यांकडे दुबार पेरणीकरिता बियाणे खरेदीसाठी पैसे नाहीत. या परिस्थितीत महाबीजने शेतकऱ्यांना सोयाबीनचे बियाणे बदलून द्यावे या मागणीसाठी सोमवारी स्वाभिमानी शेतकरी संघटनेचे जिल्हाध्यक्ष किशोर ढगे, डिंगबर पवार, भास्कर खटिंग, केशव आरमळ, मुंजाभाऊ लोडे, दत्ता गरुड आदी कार्यकर्त्यांनी निदर्शने केली;

परंतु, महाबीज प्रशासनाने बियाणे बदलून देण्यास चालढकल केली. त्यामुळे ‘स्वाभिमानी’च्या कार्यकर्त्यांनी विभागीय व्यवस्थापक ए. एस. सोनुने यांना घेराव घालून बियाणे बदलून देण्याची मागणी केली. या आंदोलनामुळे महाबीजकडून शेतकऱ्यांना बियाणे बदलून देण्यात आले, असे श्री.ढगे यांनी सांगितले.