वेल्ह्यात शासकीय दरात उपलब्ध होणार कृषी निविष्ठा

पुणे  : ‘कोरोना’च्या पार्श्वभूमीवर सध्या टाळेबंदी सुरु आहे. या स्थितीतही शेतकऱ्यांना शासकीय दरात खते व बियाण्यांचा पुरवठा करण्यात येणार आहे. मात्र वेल्हा तालुक्यात खते व बियाण्यांचा पुरवठा करणारा एकही घाऊक विक्रेता नव्हता. त्यामुळे शेतकऱ्यांना नसरापूर येथे जावे लागत होते. या पार्श्वभूमीवर जिल्हा परिषदेच्या पुढाकारातून वेल्हा येथील पंचायत समितीच्या गोदामामध्ये कृषी सेवा केंद्र सुरू करण्यात आले आहे. त्यामुळे शेतकऱ्यांना शासकीय दरात कृषी निविष्ठांचा पुरवठा होणार आहे, अशी माहिती उपाध्यक्ष रणजित शिवतरे यांनी दिली.

वेल्हे तालुक्यात घाऊक विक्रेता नसल्याने शेतकऱ्यांना भात बियाणे व खतांसह इतर कृषी निविष्ठा खरेदीसाठी नसरापूर येथे जावे लागत होते. जिल्ह्यात ‘कोरोना’चा प्रादुर्भाव वाढला असून, नसरापूर येथेही प्रतिबंधित क्षेत्र घोषित करण्यात आले आहे. त्यामुळे वेल्हे तालुक्यातील शेतकऱ्यांना यंदाच्या खरीप हंगामात भात बियाणे व खतांचा तुटवडा भासण्याची भिती तालुकास्तरीय खरीप हंगाम बैठकीत व्यक्त करण्यात आली होती. या पार्श्वभूमीवर वेल्हे तालुक्यात कृषी सेवा केंद्रासाठी शासकीय जागा उपलब्ध करून देण्याचे आश्‍वासन श्री. शिवतरे यांनी दिले होते. त्यानंतर पंचायत समितीच्या गोदामात जागा उपलब्ध करून देण्यात आली असून, कृषी सेवा केंद्र सुरू करण्यात आले आहे.

केंद्राचे उद्घाटन रविवारी उपाध्यक्ष रणजित शिवतरे यांच्या हस्ते करण्यात आले. पंचायत समिती सदस्य अनता दारवटकर, माजी जिल्हा परिषद सदस्य आनंद देशमाने, तालुका कृषी अधिकारी धनंजय कोंढाळकर, वेल्हे तालुक्यातील शेतकरी उपस्थित होते. वेल्हे तालुक्यातील १४५ शेतकरी गटांना इंद्रायणी भाताचे बियाणे, युरिया, डीएपी आदींचा पुरवठा करण्यात येणार आहे. शेतकरी गटाचे प्रमुख, कृषी मित्र व कृषी सहायकांनी गावातील शेतकऱ्यांची चर्चा करून खरीप हंगामात त्यांना लागणाऱ्या बियाणे व खतांची मागणी नोंदवावी, त्यानंतर वेल्हा येथील केंद्रात शेतकऱ्यांना पुरवठा केला जाईल, असे श्री. शिवतरे यांनी सांगितले.