पुण्यात कृषी आयटीआय संस्था सुरू करणार : उपमुख्यमंत्री अजित पवार

पुणे : कृषी, सहकार, उद्योग विभागाला चालना देण्याबरोबरच तरुणांना कौशल्य विकासाचे प्रशिक्षण देऊन रोजगार उपलब्ध करून देण्यासाठी राज्य सरकार प्रयत्नशील आहे. राज्यात कृषी आयटीआयसारखी नवीन संकल्पना राबविण्यात येणार आहे. राज्यातील तरुणांचा कौशल्य विकास साधण्याच्या दृष्टीने हा प्रकल्प महत्त्वाचा ठरेल. त्यापैकी एक महत्त्वाची संस्था पुणे जिल्ह्यात सुरू करणार असल्याची माहिती उपमुख्यमंत्री व पुण्याचे पालकमंत्री अजित पवार यांनी दिली.

प्रजासत्ताक दिनाच्या ७० व्या वर्धापन दिनानिमित्त रविवारी (ता. २६) शिवाजीनगर पोलिस परेड ग्राउंड येथे उपमुख्यमंत्री पवार यांच्‍या हस्‍ते ध्‍वजारोहण झाले. विभागीय आयुक्त डॉ. दीपक म्हैसेकर, जिल्हाधिकारी नवल किशोर राम, पोलिस आयुक्त डॉ. के. व्यंकटेशम, पिंपरी-चिंचवड पोलिस आयुक्त संदीप बिष्णोई, जिल्हा पोलिस अधीक्षक संदीप पाटील आदी या वेळी उपस्थित होते. उपमुख्यमंत्री पवार यांनी विविध पथकांची पाहणी करून मानवंदना स्वीकारली. राष्ट्रपती पोलिस पदकप्राप्त व विशेष सुरक्षा पदकप्राप्त पोलिस अधिकारी व कर्मचाऱ्यांचा, तसेच विविध क्षेत्रांत उल्लेखनीय कामगिरी करणाऱ्या अधिकारी व कर्मचाऱ्यांना उपमुख्यमंत्री पवार यांच्या हस्ते गौरविण्यात आले.

उपमुख्यमंत्री पवार म्हणाले, की पर्यावरण रक्षणासाठी नागरिकांनी प्लॅस्टिकच्या वस्तूंचा वापर टाळणे गरजेचे आहे. आजपासून प्लॅस्टिक पिशवीमुक्त महाराष्ट्र संकल्प अभियान सुरू करण्यात येत आहे. पुण्यात मेट्रोची कामे गतीने होण्यासाठी पाठपुरावा करण्यात येत असून, ही कामे पूर्ण झाल्यानंतर पुण्याच्या वाहतूक व्यवस्थेत निश्चितच सुधारणा होईल.