निसर्ग चक्रीवादळग्रस्तांना तातडीने मदत देण्याचे प्रयत्न ः अजित पवार

पुणे  ः निसर्ग चक्रीवादळामुळे बाधित झालेल्या नागरिकांना तातडीने मदत देता यावी, यासाठी नुकसानीचे पंचनामे लवकर करण्याचे आदेश प्रशासनाला दिले आहेत. पुण्यासह राज्यातील सर्व बधितांना जास्तीत जास्त मदत केली जाईल, असा विश्वास उपमुख्यमंत्री तथा जिल्ह्याचे पालकमंत्री अजित पवार यांनी दिला. 

निसर्ग चक्रीवादळामुळे पुणे जिल्ह्यात झालेल्या नुकसानीचा शुक्रवारी (ता.५) पालकमंत्री अजित पवार यांनी आढावा घेतला. त्यानंतर शनिवारी (ता.६) श्री. पवार यांच्या अध्यक्षतेखाली विधानभवनात आढावा बैठक झाली. यावेळी कामगार मंत्री दिलीप वळसे-पाटील, जिल्हा परिषदेच्या अध्यक्षा निर्मला पानसरे, खासदार श्रीरंग बारणे, डॉ. अमोल कोल्हे, आमदार दिलीप मोहिते-पाटील, अशोक पवार, सुनील शेळके, अतुल बेनके, संग्राम थोपटे, सुनील टिंगरे, विभागीय आयुक्त डॉ. दिपक म्हैसेकर, जिल्हाधिकारी नवल किशोर राम आदी उपस्थित होते.

जिल्ह्यातील ३७१ गावांतील सुमारे २८ हजार शेतकऱ्यांचे ७ हजार हेक्टर क्षेत्राचे नुकसान झाल्याचा प्राथमिक अंदाज आहे. यावेळी लोकप्रतिनिधींनी तालुकानिहाय नुकसानीची माहिती मंत्री पवार यांना दिली. त्यांनी केलेल्या सूचनांचा विचार करून, मंत्रिमंडळ बैठकीत याबाबत योग्य निर्णय घेतला जाईल, असे श्री. पवार यांनी सांगितले.

पाणीपुरवठा योजनांचा वीजपुरवठा तत्काळ सुरू करणे, वीजेचे खांब उभे करणे, गरज भासल्यास दुसऱ्या जिल्ह्यातील मनुष्यबळाची मदत घेणे, आदिवासी-बिगर आदिवासी भागातील लोकांना तातडीने मदत देणे, घर, शाळा, अंगणवाड्यांची दुरुस्तीची कामे तातडीने सुरू करणे, नुकसानीचे पंचनामे तत्काळ पूर्ण करून अहवाल सादर करणे आदी सूचना त्यांनी केल्या.  

यावेळी वळसे पाटील यांनी आदिवासी भागातील बाळहिरड्याचे प्रचंड नुकसान झाल्याचे सांगितले. आदिवासी भागातील हे प्रमुख उत्पन्नाचे साधन आहे. बाळहिरड्याला प्रति किलो २४० रुपये इतका भाव आहे. या आदिवासी भागातील शेतकऱ्यांना वेगळा मापदंड लावून नुकसान भरपाई देण्याचा विचार व्हावा. आदिवासी भागात घरांचेही मोठे नुकसान झाले, त्यासाठी तातडीने मदत द्यावी, अशी मागणी त्यांनी केली.