बाजार समिती निवडणुकीत शेतकऱ्यांना मतदानाचा अधिकार मिळाण्यासाठी ठराव

नाशिक  : कृषी उत्पन्न बाजार समित्यांच्या निवडणुकीत शेतकऱ्यांना थेट मतदानाचा अधिकार देण्याचा निर्णय महायुतीच्या सरकारने घेतला होता. हा निर्णय महाविकास आघाडी सरकारने रद्द केला आहे. बाजार समिती निवडणुकीत शेतकऱ्यांना थेट मतदानाचा अधिकार पुन्हा मिळावा, यासाठी निफाड तालुक्यातील नैताळे ग्रामपंचायतीच्या सदस्यांनी ग्रामसभेत ठराव मांडला. सरपंच व उपसरपंच यांनी अनुमोदन देत हा ठराव संमत केला. 

नैताळे - रामपूर ग्रामपंचायतीच्या रविवारी (ता. २६) झालेल्या ग्रामसभेत बाजार समित्यांच्या निवडणुकीत शेतकऱ्यांना थेट मतदानाचा अधिकार मिळावा यासाठी ठराव संमत करण्यात आला. ग्रामसभेच्या अध्यक्षस्थानी सरपंच मनिषा डावखर होत्या. उपसरपंच संजय बोरगुडे, सदस्य अरविंद बोरगुडे, माजी सरपंच दादा बोरगुडे, सोसायटी संचालक राजेंद्र घायाळ, रतन बोरगुडे, सुनिल बोरगुडे, तलाठी शांताराम गांगुर्डे, ग्रामविकास अधिकारी डी. एम. दुकळे आणि ग्रामस्थ या वेळी उपस्थित होते. जे शेतकरी बाजार समितीत शेतीमाल विक्री करतील त्यांना संचालक निवडीसाठी बाजार समितीच्या निवडणूक प्रक्रियेत मतदान करण्याचा अधिकार मिळावा, अशी सूचना ग्रामसभेत सदस्य अरविंद बोरगुडे यांनी मांडली. त्यावर ग्रामसभेस उपस्थित नागरिकांनी सूचना व मनोगते मांडली. 

शेतकरी आपला शेतमाल बाजार समित्यांमध्ये विक्री करतात. परंतु, त्यांना संचालक निवड प्रक्रियेत मतदानाचा हक्क बजावता येत नव्हता. महायुतीच्या शासनाने शेतकऱ्यांना बाजार समिती निवडणुकीत थेट मतदानाचा अधिकार दिला होता. परंतु, आता बाजार समिती संचालक मंडळाच्या निवड प्रक्रियेत फक्त ग्रामपंचायत, विकास कार्यकारी सोसायटी व इतर संस्थांच्या सदस्यांनाच मतदान करता येईल असा बदल करण्यात आला आहे. हा केलेला बदल रद्द करण्यात यावा व शेतकऱ्यांना या प्रक्रियेत थेट मतदानाचा अधिकार मिळावा अशी  सूचना या वेळी मांडण्यात आली.

या सूचनेला सरपंच सौ. मनिषा डावखर, उपसरपंच संजय बोरगुडे यांनी अनुमोदन दिले. हा ठराव ग्रामसभेत सर्वानुमते ठराव संमत करण्यात आला. संमत झालेल्या ठरावाची प्रत मुख्यमंत्री, कृषिमंत्री, सहकार व पणनमंत्री तसेच पालकमंत्र्यांना पाठविण्यात येईल, अशी माहिती उपसरपंच संजय बोरगुडे यांनी दिली.