भीमा खोऱ्यातील धरणांमध्ये ८५ टक्के पाणी

पुणे  : जिल्ह्याच्या धरणक्षेत्रात यंदा दमदार पाऊस झाल्याने उजनीसह सर्वच धरणे ओसंडून वाहिली. मॉन्सूनच्या शेवटच्या टप्प्यातही पाऊस झाल्याने जिल्ह्यातील धरणांमध्ये यंदा चांगला पाणीसाठा आहे. मंगळवारी (ता. २१) उजनीसह सर्व धरणांमध्ये मिळून १८५.३५ टीएमसी (८५.४८ टक्के) पाणीसाठा आहे. खडकवासला प्रकल्पात २२.८१ टीएमसी (७८ टक्के) पाणीसाठा असल्याचे पाटबंधारे विभागातर्फे सांगण्यात आले.

उजनीसह पुणे जिल्ह्यातील सर्व २५ धरणांची चल (उपयुक्त) पाणीसाठ्याची क्षमता २१६.८४ टीएमसी आहे. २०१८ मधील तीव्र दुष्काळामुळे धरणांतील पाणीसाठा खूपच खालावला होता. उजनीसह अनेक धरणे अचल पातळीत गेली होती. मात्र यंदाच्या हंगामात पावसाने दमदार हजेरीने यंदा सर्वच धरणांमध्ये समाधानकारक पाणीसाठा झाला. जानेवारी महिन्यात शेतीसाठी आवर्तने सोडण्यास सुरुवात झाली आहे.

खडकवासला प्रकल्पात यंदा गतवर्षीपेक्षा अधिक पाणीसाठा आहे. गतवर्षी याच काळात प्रकल्पातील चारही धरणांमध्ये मिळून १६.०५ टीएमसी (५५ टक्के) पाणीसाठा होता. उजनी धरणातही यंदा चांगला पाणीसाठा असून, चल पाणीपातळी कमी होण्यास सुरुवात झाली आहे. धरणाच्या चलपातळीत ५३.१६ टीएमसी (९९.२३ टक्के) आणि अचल पातळीत ६३.६५ टीएमसी असा एकूण ११६.८१ टीएमसी (९९.६५ टक्के) पाणीसाठा शिल्लक आहे. 

मंगळवारी (ता. २१) जिल्ह्यातील धरणांमधील पाणीसाठा (टीएमसी) कंसात टक्केवारी : टेमघर ०.३२ (९), वरसगाव ११.१० (८७), पानशेत ९.५४ (९०), खडकवासला १.८६ (९४), पवना ६.८२ (८०), कासारसाई ०.४५ (९८), मुळशी ११.४८ (६२), कळमोडी १.५० (१००), चासकमान ६.८४ (९०), भामा आसखेड ७.३२ (९५), आंद्रा २.७९ (९६), वडीवळे ०.७० (६५), गुंजवणी ३.३४ (९१), भाटघर २१.६७ (९२), नीरा देवघर ११.५५ (९९), वीर ५.१८ (५५), नाझरे ०.५५ (९४), पिंपळगाव जोगे ३.०५ (७८), माणिकडोह ६.९८ (६७), येडगाव १.५६ (८०), वडज १.१० (९४), डिंभे ११.२६ (९०), घोड ४.३९ (९०), विसापूर ०.८४ (९२).