कर्नाटक सीमेवरील शेतकऱ्यांची शेतीची वाट बंद

गडहिंग्लज, जि.कोल्हापूर  : कर्नाटकच्या संकेश्‍वरमधील पंधराहून अधिक शेतकऱ्यांची शेती महाराष्ट्रातील नांगनूरसह (ता. गडहिंग्लज) इतर गावांच्या हद्दीत आहे. परंतु, बेळगाव जिल्हा रेड झोनमध्ये येत असल्याने कर्नाटकातील नागरिकांना महाराष्ट्रात येण्यास बंदी आहे. याचा फटका शेतकऱ्यांनाही बसत आहे. संकेश्‍वरच्या शेतकऱ्यांना नांगनूरमध्ये येण्यास प्रतिबंध केला आहे. परिणामी, त्यांच्या शेताची वाट बंद झाली आहे.

नांगनूरपासून अवघ्या चार किलोमीटरवर असलेल्या संकेश्‍वरात कोरोना बाधित रूग्ण आढळला आहे. महाराष्ट्रातील प्रशासनाने तातडीने आंतरराज्य सीमाबंदी करून कर्नाटकच्या कोणालाही महाराष्ट्रातील प्रवेशाला प्रतिबंध केला आहे. नांगनूरच्या हद्दीत संकेश्‍वरमधील शेतकऱ्यांची शेती आहे. तसेच अरळगुंडी भागातही काहींची शेती आहे. नेसरी भागातील महाराष्ट्रातील हेब्बाळ जलद्याळ आणि कर्नाटकातील दड्डी गावची परिस्थितीही अशीच आहे. या दोन्ही गावांच्या शेतकऱ्यांच्या जमिनी एकमेकांच्या हद्दीत आहेत. परंतु, या ठिकाणी शेतीकामे सुरळीत सुरू आहेत. या दोन्ही गावांच्यामध्ये चेकपोस्ट असला तरी शेतातूनच ये-जा सुरू असल्याने तेथे कोणतीच अडचण नसल्याचे सांगण्यात आले. परंतु संकेश्‍वर व नांगनूरची परिस्थिती वेगळी आहे.

नांगनूर व संकेश्‍वर या दोन गावांच्या मध्ये हिरण्यकेशी नदी आहे. यामुळे संकेश्‍वरच्या शेतकऱ्यांना महाराष्ट्र हद्दीतील चेकपोस्ट ओलांडूनच शेतात जावे लागते. परिणामी प्रशासनाने दिलेल्या आदेशानुसार या नाक्‍यातून शेतकऱ्यांना प्रवेश दिला जात नाही. रोज संबंधित शेतकरी आणि नाक्‍यावरील कर्मचाऱ्यांशी वाद सुरू आहे. .