पुणे जिल्‍ह्यात खरिपासाठी एक लाख ८० हजार टन खतांची मागणी

पुणे   ः पुणे जिल्हयात खरीप हंगामाची तयारी सुरू झाली आहे. खरीप हंगामात शेतकऱ्यांनी कृषी विभागाकडे सुमारे एक लाख ८० हजार टन खतांची मागणी नोंदविली आहे. तसेच गेल्या वर्षीचे ११ हजार ४७४ टन खते शिल्लक असून, मागणी केलेल्या खतांचा पुरवठा मंजूर केल्यास मोठ्या प्रमाणात खते उपलब्ध होणार असल्याचे कृषी विभागाच्या सूत्रांनी सांगितले.

जिल्ह्यात खरीप हंगामाचे सरासरी क्षेत्र दोन लाख ८८ हजार २३७ हेक्टर आहे. त्यापैकी दोन लाख ३० हजार हेक्टरवर पेरणी होण्याचा अंदाज आहे. यामध्ये भात व सोयाबीनच्या क्षेत्राच्या वाढ होण्याची शक्यता आहे. शेतकऱ्यांकडून होणारी खतांची मागणी लक्षात घेऊन कृषी विभागाने पुरवठयाचे नियोजन केले आहे. लवकरच कृषी आयुक्तलयाकडून खतासाठ्याला मंजुरी मिळणार असून त्यानंतर शेतकऱ्यांना या खतांचा पुरवठा होणार आहे.

यंदा खरीपासाठी सुमारे एक लाख ९१ हजार ४७४ मेट्रीक टन खते उपलब्ध होण्याची शक्यता आहे. संयुक्त खतांची ७१ हजार टन, सरळ खतांची एक लाख ९ हजार टन मागणी केली आहे. गेल्या वर्षी खरीप हंगामात शेतकऱ्यांनी कृषी विभागाकडे सुमारे एक लाख ९० हजार टन खताची मागणी नोंदविली होती. त्यापैकी कृषी विभागाने एक लाख ८५ हजार १५८ टन खतांचा पुरवठा मंजूर केला होता. मात्र, यंदा मागणी कमी केली असली तरी शिल्लक खतांचा साठा अधिक असल्याने मोठ्या प्रमाणात खते उपलब्ध होणार आहेत.

गेल्या वर्षीची ११,४७४ टन खते शिल्लक गेल्या वर्षी पुणे जिल्हयात खरिपात एक लाख ३२ हजार ८०३ टन खतांचा पुरवठा झाला होता. त्यापाठोपाठ रब्बीतही खतांचा पुरवठा व्यवस्थित असल्याने १ एप्रिल रोजी ११ हजार ४७४ टन खते शिल्लक असल्याचे समोर आले. यामध्ये ९ हजार ८२७ टन संयुक्त खतांचा, एक हजार ६४७ टन सरळ खतांचा समावेश आहे. --------------------------------