परभणी जिल्ह्यात खरिपाची अंतिम पैसेवारी सरासरी ४७.२२ पैसे

परभणी  ः जिल्ह्यातील पैसेवारीसाठी पात्र ८४८ गावांची यंदाच्या (२०१९-२०) खरीप हंगामातील पिकांची अंतिम पैसेवारी सरासरी ४७.२२ पैसे आली आहे. जिल्हा प्रशासनातर्फे रविवारी (ता. १५) खरिपाची अंतिम पैसेवारी जाहीर करण्यात आल्याची माहिती महसूल विभागाच्या सूत्रांनी दिली.

जिल्हा प्रशासनाकडून यापूर्वी ३० सप्टेंबर रोजी जाहीर करण्यात आलेली खरिपाची हंगामी (नजरी) पैसेवारी सरासरी ६१.८४ पैसे होती. त्यानंतर ३१ ऑक्टोबरला जाहीर करण्यात आलेली सुधारित हंगामी पैसेवारी सरासरी ५९.३२ पैसे होती. नजरी आणि हंगामी पैसेवारी ५० पैसे जास्त आली होती. फक्त परभणी तालुक्यांतील ५ गावांची सुधारित पैसैवारी ५० पेक्षा कमी आली होती. परंतु, सर्व ८४८ गावांची अंतिम पैसेवारी सरासरी ५० पैश्यांपेक्षा कमी आली आहे. 

परभणी जिल्ह्यात एकूण ८५२ गावे असून त्यापैकी बलसा (ता. परभणी) गावाचे कृषिक्षेत्र कृषी विद्यापीठासाठी तर करडखेडा (ता. सेलू), चौधरणी खु., लिंबाळा (ता. जिंतूर) या तीन गावांचे संपूर्ण कृषी क्षेत्र धरणासाठी संपादित करण्यात आले आहे. त्यामुळे जिल्ह्यातील एकूण ८४८ गावे पैसेवारीसाठी पात्र आहेत. जिल्ह्यातील लागवडीयोग्य ५ लाख ५८ हजार ७२९.९३ हेक्टर क्षेत्रापैकी

यंदाच्या खरीप हंगामात ५ लाख ३४ हजार ३४७ हेक्टरवर विविध पिकांची पेरणी झाली. परंतु, २४ हजार ३८२ हेक्टर क्षेत्र पडीक राहिले होते. यंदा जिल्ह्यातील सर्व नऊ तालुक्यांतील ८४८ गावांची अंतिम पैसेवारी ५० पैश्यांपेक्षा कमी म्हणजेच सरासरी ४७.२२ पैसे आली आहे असे महसूल विभागाच्या सूत्रांनी सांगितले.