नगर जिल्ह्यात ४८ हजार हेक्टरवर चारा लागवड

नगर : जिल्ह्यात यंदा पाण्याची बऱ्यापैकी उपलब्धता असल्याने चारा लागवडीचे क्षेत्र वाढत आहे. जिल्ह्यात यंदा आतापर्यंत ४८ हजार ९५ हेक्टर क्षेत्रावर चारा लागवड झाली आहे. सर्वाधिक चाऱ्याचे क्षेत्र संगमनेर, श्रीगोंदा तालुक्यांत आहे. श्रीरामपूर क्षेत्रात फारशी वाढ झालेली नाही. 

जिल्ह्यात दूध व्यवसायाला प्राधान्य दिले जात आहे. गेल्या दोन वर्षांत मात्र दुष्काळ, पाणीटंचाईमुळे चाऱ्याचा प्रश्न गंभीर झाल्याने दूध व्यवसायावर संकट कोसळले. गंभीर चाराटंचाईला सामोरे जावे लागल्याने शेतकऱ्यांनी यंदा चारा उत्पादनावर भर दिला आहे. यंदा जिल्हाभर चांगल्या पैकी पाणी उपलब्ध झाले असल्याने चाऱ्याचे क्षेत्र वाढत आहे. गेल्या वर्षी वीस हजारांपुढे चाऱ्याचे क्षेत्र गेले नव्हते. यंदा मात्र आतापर्यंत ४८ हजार ९५ हेक्टर क्षेत्रावर चाऱ्याची लागवड झाली आहे. त्यात १८ हजार ५२१ हेक्टरवर मका, ९७०० हेक्टरवर ज्वारी कडवळ, ५८८६ हेक्टरवर लुसर्न ग्रास, १५७९ हेक्टरवर नेपीयर ग्रास तर १२ हजार ४०२ हेक्टरवर इतर चारापीकांची लागवड झाली आहे.    तालुकानिहाय चारा क्षेत्र (हेक्टर) : नगर ः ४९५३, पारनेर ः ४२५५, श्रीगोंदा ः ६४६७, कर्जत ः ४०७३, जामखेड ः ६१२, शेवगाव ः २०६१, पाथर्डी ः २४८२, नेवासा ः १८११, राहुरी ः ५८८०, संगमनेर ः ८६००, अकोले ः १५८३, कोपरगाव ः२२२६, श्रीरामपूर ः ७७८, राहाता ः २३०९.