नगर जिल्ह्यात बिबट्याचा धुमाकूळ सुरुच

नगर  ः नगर जिल्ह्याच्या विविध भागांत बिबट्याचा धुमाकूळ सुरुच आहे. पाथर्डी तालुक्‍यातील रांजणी येथे बिबट्याच्या हल्ल्यात गाय तर टाकळीभान (ता. श्रीरामपुर) येथे दोन शेळ्या मृत्यूमुखी पडल्या.  

रांजणीतील शेतकरी गणेश साळुंके गावाच्या शिवारात डोंगराच्या पायथ्याशी गुरे चारण्यासाठी गेले होते. अचानक आलेल्या बिबट्याने गाय व वासरावर हल्ला चढवला. यामध्ये गाईचा मृत्यू झाला, तर वासरू जखमी झाले. बिबट्याने वासराच्या मानेला धरले असता साळुंके यांनी आरडाओरड केली. त्यामुळे बिबट्याने तेथून पळ काढला. रांजणी, माणिकदौंडी, केळवंडीसह बीड जिल्ह्यातील मायंबा डोंगर परिसरात बिबट्याचा वावर नियमित असतो. शेळ्या, मेंढ्या, गाय, बैल आदी प्राण्यांवर बिबट्याने हल्ला केल्याच्या अनेक घटना घडल्या आहेत.

श्रीरामपूर, तालुक्यातील टाकळीभान घुमनदेव रस्त्यालगत बोडखे यांची वस्तीवर अमृत बोडखे व भाऊसाहेब कांगुणे यांच्या वस्तीवर बिबट्याने दोन शेळ्या फस्त केल्या. बिबट्याने वस्तीत प्रवेश करून घरासमोरच बांधलेल्या एका शेळीचा फडशा पाडला. इतर शेळ्यांचा आवाज ऐकल्यावर बोडखे यांनी खिडकीतून पाहिले असता बिबट्या शेळीला घेऊन जात असल्याचे दिसून आले. बोडखे यांनी आरडाओरड केली. मात्र, तो पळाला. कांगुणे यांच्या वस्तीत बिबट्याने प्रवेश करून शेळीचा फडशा पाडला.