टोळधाड उत्तर प्रदेशात

कानपूर, उत्तर प्रदेश  ः शेतकऱ्यांसाठी मोठी गंभीर समस्या ठरलेली टोळधाड सध्या गंगा नदीच्या प्रदेशात तसेच कानपूर भागात आढळून आली आहे. त्यानुसार परिसरातील शेतकऱ्यांना सतर्कतेचा इशारा देण्यात आला आहे. सरकारी यंत्रणांनी दिलेल्या सूचनांचे पालन करून शेतकऱ्यांनी टोळधाडीपासून बचाव करण्यासाठी सज्ज राहावे, असे आवाहन करण्यात आले आहे. कृषी विभागाबरोबरच पोलिस खाते, आरोग्य खाते व अग्निशामक दलही सतर्क झाले आहे.    

केंद्रीय कृषी मंत्रालयाने दिलेल्या माहितीनुसार राजस्थान, हरियाना व उत्तर प्रदेश या राज्यांकडून तसेच लोकस्ट कंट्रोल ऑर्गनायझेशन यांच्याकडून टोळधाडीवर देखरेख करण्यात येत आहे.  मे महिन्याच्या दरम्यान टोळधाडीने मध्य प्रदेशातून महाराष्ट्राकडे आपला मोर्चा वळवत आपले उग्र स्वरूप दाखवले. सद्यःस्थितीत राजस्थानातील पश्‍चिम उदयपूर भागात ही टोळधाड असली तरी मध्य प्रदेश व उत्तर प्रदेशातील काही भागातही तिची नोंद झाली आहे. २७ जूनला  झालेल्या जोरदार वाऱ्यांमुळे पिलावस्थेतील छोट्या स्वरूपातील थवा उत्तरेकडील कुशीनगर व सिद्धार्थनगर भागात पोचला. त्यानंतर त्याची विभागणी होऊन त्यातील काही टोळधाड नेपाळच्या बाजूस सरकली.