कोळवण परिसरात प्रतिकूल हवामानामुळे आंब्याचा मोहोर गळतोय

कोळवण, जि. पुणे  : हवामानातील बदलांचा परिणाम पिकांवर होत असून, गेल्या दोन दिवसांपासून सकाळी धुके, दुपारी कडक ऊन व सायंकाळी ढगाळ हवामानामुळे आंब्याचा मोहर गळू लागला आहे. 

मुळशी तालुक्‍याच्या पश्‍चिमेकडील खेचरे-मांदेडे, भादस, कोळवण खोरे आहे. या खोऱ्याची ओळख ‘आमराई’ म्हणून आहे. कोळवण परिसरात पायरी, हापूस, तोतापुरी, रायवाळ जातीच्या आंब्यांची झाडे मोठ्या प्रमाणात आहेत. ढगाळ वातावरणाचा परिणाम आंबा उत्पादनावर होणार असल्याने अनेक शेतकरी, बागायतदार चिंतेत आहेत.

कोकणातील हापूस आंब्यापेक्षा मुळशीच्या आमराईतील आंब्यांची चव अधिक मधुर असते. बाजारात कोकणच्या आंब्याला पाचशे रुपये डझनाचा भाव मिळत असला, तरी मुळशीच्या या आंब्यांना फक्त १०० ते १५० रुपये डझन असा कमी भाव मिळतो. असे असले तरीही या भागातील शेतकरी चांगले उत्पन्न मिळवतात. अनेक शेतांमध्ये व बागांमध्ये आंब्यांच्या झाडांचे प्रमाण अधिक आहे. तरकारी व कोरडवाहू शेतकऱ्यांसाठी आंबा उत्पादन हातखर्च भागवण्यासाठी उपयोगी ठरतो. हवामानातील बदलामुळे मोहर गळू लागल्याने आंब्याच्या उत्पादनावर थेट परिणाम होणार आहे.