केरळचा बहुतांश भाग मॉन्सूनने व्यापला

पुणे  : महाराष्ट्रासह देशभरातील शेतकऱ्यांना ओढ लागून असलेले नैर्ऋत्य मोसमी वारे (मॉन्सून) सोमवारी (ता.१) देवभूमी केरळमध्ये दाखल झाले आहे. मॉन्सूनचे आगमन यंदा लांबण्याची शक्यता असताना, अरबी समुद्रात असलेल्या कमी दाब क्षेत्रामुळे मॉन्सूनने वेगाने चाल करत केरळमध्ये आगमन केले. मॉन्सूनने श्रीलंकेचा दक्षिण भाग, केरळच्या कन्नूर, तामिळनाडूच्या कोईंम्बतूर, कन्याकुमारीपर्यंतचा भाग व्यापला असल्याचे हवामान विभागाने स्पष्ट केले आहे.

यंदा मॉन्सून सर्वसाधारण वेळेच्या चार दिवस उशीराने म्हणजेच ५ जून रोजी दाखल होण्याची शक्यता हवामान विभागाने वर्तविली होती. यात चार दिवसांची मागे पुढे तफावतही गृहित धरण्यात आली होती. मात्र पूर्व-मध्य अरबी समुद्रात रविवारी (ता.३१) तयार झालेल्या कमी दाब क्षेत्राने वाऱ्यांना खेचून आणल्याने मॉन्सून नियमित वेळवर १ जूनला केरळमध्ये दाखल झाला आहे. अरबी समुद्रात ढगांची दाटी झाली असून, केरळमध्ये पाऊस पडत आहे. कर्नाटक, महाराष्ट्रामध्ये पूर्वमोसमी पावसाच्या सरींनी हजेरी लावली आहे. कमी दाब क्षेत्र उत्तरेकडे सरकत जाताना त्याचे वादळात रुपांतर होणार असल्याने किनारपट्टीलगत मॉन्सूनची आणखी वाटचाल होण्याची शक्यता आहे.

दरम्यान बंगालच्या उपसागात आलेल्या ‘अम्फान’ चक्रीवादळामुळे यंदा वेळेआधीच १७ मे रोजी मॉन्सून अंदमान, निकोबार बेटांवर दाखल झाला होता. मात्र हे चक्रीवादळ उत्तरेकडे सरकल्यानंतर तब्बल दहा दिवस दक्षिण दक्षिण अंदमानातच मॉन्सून अडखळला. उपसागरातील वाटचाल पुन्हा सुरू करत, गुरूवारी (ता.२८) दुसऱ्याच दिवशी मॉन्सूनने संपर्ण अंदमान बेटे आणि बंगालच्या उपसागराच्या आणखी काही भागात धडक दिली होती. शनिवारी (ता.३०) भारताच्या दक्षिणेकडे असलेल्या श्रीलंकेच्या दक्षिण भागासह, मालदिव आणि कोमोरीन भागातही मॉन्सून वारे दाखल झाले होते. सोमवारी (ता.१) मॉन्सूनने मोठी धाव घेत संपूर्ण दक्षिण अरबी समुद्र, लक्षद्वीप बेटे, मालदिवचा उर्वरीत भाग, केरळचा बहुतांशी भाग, तमिळनाडू, पदुच्चेरीच्या भागासह दक्षिण बंगालच्या उपसारातील काही भागात प्रगती केली असल्याचे हवामान विभागातर्फे सांगण्यात आले.