कोल्हापुरात मजूराला प्रवासास परवानगी दिल्याप्रकरणी गुन्हा दाखल

कोल्हापूर  ः कोरोनो विषाणूचा प्रादुर्भाव रोखण्यासाठी जिल्हाधिकाऱ्यांनी जिल्ह्यात संचारबंदी लागू केली आहे. लाॅकडाऊन असतानाही हातकणंगले तालुक्यातील नरंदे येथील शरद सहकारी साखर कारखान्याचे कार्यकारी संचालक संतोष डिग्रजे यांनी ऊस तोडणी हंगाम पूर्ण झाल्याने मजूरास लेटर पॅडवर गावी जाण्यास परवानगी देवून संचारबंदीचे उल्लंघन केले आहे. याबाबत प्रादेशिक सहसंचालक साखर कार्यालयाचे उपसंचालक (साखर) एस.एन. जाधव यांनी हातकणंगले पोलिसांत फिर्याद दिली असून गुन्हा दाखल करण्यात आला आहे.  

फिर्यादित म्हटले आहे, की कोरोना विषाणूचा प्रादुर्भाव रोखण्यासाठी प्रतिबंधात्मक उपाययोजना म्हणून जिल्ह्यात संचारबंदी लागू करण्यात आली आहे. अत्यावश्यक व जीवनावश्यक वस्तुंची वाहतूक वगळून अन्य वाहतुकीसाठी बंदी घालण्यात आली आहे. असे असताना शरद सहकारी साखर कारखान्याचे कार्यकारी संचालक संतोष डिग्रजे यांनी कारखान्याच्या लेटर पॅडवर मजूर रामकिसन भगवान वायनसे (रा. नामेवारी, ता. केज, जि. बीड) हे कारखान्याकडील गळीत हंगाम २०१९-२०२० ऊस तोडणी वाहतूक पूर्ण झाल्याने गावी जात आहेत. त्यांना गावी जाण्यासाठी परवानगी दिलेली आहे. त्यांना जाण्यासाठी अडथळा करु नये, सोडण्यात यावे. अशा आशयाचे पत्र देवून जिल्हाधिकाऱ्यांच्या आदेशाचे उल्लंघन केले आहे.