वाहतूक बंद असल्याने संत्रा उत्पादकांचे १०० कोटींचे नुकसान

अमरावती  ः कोरोना विषाणू प्रादुर्भावाच्या पार्श्वभुमीवर वाहतूक व्यवस्था बंद आहे. त्याचा सर्वाधिक फटका वरुड तालुक्‍यातील संत्रा उत्पादकांना बसला आहे. यामुळे सुमारे १०० कोटींचे नुकसान होण्याचा अंदाज असल्याने या नुकसानीच्या सर्व्हेक्षणासाठी उपग्रहाचा वापर करावा, अशी मागणी संत्रा उत्पादक शेतकऱ्यांनी केली आहे.  

गेल्या तीन ते चार वर्षांपासून अस्मानी संकटांचा मुकाबला करुन शेतकऱ्यांनी संत्रा बागा जगविल्या आहेत. हंगामाच्या पूर्वार्धात भावात थोडी पडझड झाली असली तरी त्यानंतर बाजार सावरल्याने शेतकऱ्यांना दिलासा मिळाला होता. आता कोरोना विषाणूचा प्रादुर्भाव रोखण्यासाठी सरकारकडून लॉकडाऊन जाहिर करण्यात आला आहे. त्याचा सर्वाधीक फटका मृग बहरात संत्रा उत्पादन घेणाऱ्या शेतकऱ्यांना बसला आहे.

एकट्या वरुड तालुक्‍यात एक लाख टन संत्र्याचे उत्पादन अपेक्षित होते. त्यापैकी आजमितीला ६० ते ६५ टक्‍के संत्र्याची विल्हेवाट लागली आहे. हंगाम अंतिम टप्प्यात असताना ३५ हजार टन संत्री झाडावर आहेत. बाजारात तेजी असल्याने २८ ते ३० हजार रुपये प्रती टन दराने सौदे सुरु होते. व्यापारी आणि संत्रा उत्पादक दोघांचीही लगबग सुरु होती. मात्र लॉकडाऊनमुळे आता सौदे रखडले आहे. काही ग्रामस्थांनी गावांच्या सीमा बंद केल्या आहेत. मृग बहाराची संत्री आता फार काळ टिकणे शकय नाही. त्यामुळे त्याची विल्हेवाट कशी लावता येईल, या विवंचनेत शेतकरी आहेत.