सातारा जिल्ह्यातील ६३ हजारांवर शेतकऱ्यांना होणार कर्जमाफीचा लाभ

सातारा  : महात्मा जोतिराव फुले शेतकरी कर्जमुक्ती योजनेच्या प्राथमिक प्रमाणीकरणाचा प्रारंभ सोमवारी (ता. २४) सातारा तालुक्यातील लिंब व फलटण तालुक्यातील गुणवरे येथे करण्यात आला. जिल्ह्यातील ६३ हजार ७७६ शेतकऱ्यांना कर्जमाफीचा लाभ होणार असून, जवळपास ४४५ कोटी रुपये एवढी थकीत कर्जाची रक्कम आहे. शेतकऱ्यांच्या याद्या शुक्रवारपर्यंत (ता. २८) उपलब्ध होणार असल्याची माहिती जिल्हा उपनिबंधक प्रकाश आष्टेकर यांनी दिली.

सातारा तालुक्यातील लिंब आणि फलटण तालुक्यातील गुणवरे येथील थकबाकीदार शेतकरी सभासदांचे आधार प्रमाणीकरण करून कर्जमाफी योजनेचा प्रारंभ सोमवारी श्री. आष्टेकर यांच्या हस्ते लिंब येथील जिल्हा मध्यवर्ती सहकारी बँकेत करण्यात आला. त्या वेळी ते बोलत होते. या वेळी तहसीलदार आशा होळकर, महाराष्ट्र बँकेचे अंचल प्रबंधक वसंत गागरे, जिल्हा अग्रणी बँक व्यवस्थापक महादेव शिरोळकर, सहायक उपनिबंधक बाळासाहेब तावरे आदी उपस्थित होते.

लिंब व गुणवरे येथील ३६२ शेतकऱ्यांची प्राथमिक यादी सोमवारी पोर्टलवर प्रसिद्ध करण्यात आली आहे. या दोन्ही गावांतील शेतकऱ्यांचे आधार प्रमाणीकरणाचे काम युद्धपातळीवर करण्यात आले. या योजनेंतर्गत लिंब व गुणवरे या गावांची यादी पोर्टलवर प्रसिद्ध करण्यात आली असून, या दोन्ही गावांतील ३६२  शेतकऱ्यांना कर्जमाफीबाबत एसएमएस पाठविण्यात आले आहेत.