अकोले तालुक्यात भात लागवडीचे प्रमाण कमीच

नगर  : अकोले तालुक्यात अद्यापपर्यंत जोरदार पाऊस नसल्याने भातलागवडीचे प्रमाण अजूनही अल्पच आहे. तालुक्यात आतापर्यंत सरासरीच्या केवळ एक टक्के भात लागवड झाल्याचे कृषी विभागाच्या सूत्रांनी सांगितले. गेले दोन दिवसांपासून भंडारदरा धरणाच्या पाणलोट क्षेत्रात पावसाला सुरवात झाली आहे. पावसाने भातखाचरे भरून गेल्याने शेतकरी समाधान व्यक्त करीत आहेत. 

अकोले तालुक्याच्या पश्चिम भागात दरवर्षी जोरदार पाऊस पडत असतो. त्यामुळे जुलै महिन्यात भातलागवडीला अधिक वेग असतो. यंदा मात्र अन्य भागांत जोरदार पाऊस झालेला असला तरी या भागात जोरदार पाऊस नाही. त्यामुळे भात लागवडीला फारसा वेग येताना दिसत नाही. तालुक्यात भाताचे क्षेत्र १४ हजार ३६ हेक्टर आहे. मात्र आतापर्यंत केवळ ९३ हेक्टर क्षेत्रावर भातलागवड झाले आहे. पुरेसा पाऊस नसल्याने भात लागवडीला अडचणी निर्माण झाल्या. 

दरम्यान, दोन दिवसांपासून अकोले तालुक्याच्या पश्चिम भागातील भंडारदरा धरणाच्या पाणलोट क्षेत्रात पावसाला सुरवात झाली आहे. आदिवासी पट्ट्यातील घाटघर, उडदावणे, पांजरे, मुतखेल, रतनवाडी, चिंचोडी, शेंडी, वाकी, पेंडशेत, बारी भागातील गावांमध्ये पावसाने जोरदार हजेरी लावली आहे. यामुळे आता भातलागवडीला वेग येणार आहे.