सोनुर्ली येथील स्वस्त धान्य दुकानाचा परवाना रद्द

चंद्रपूर : स्वस्त धान्य दुकानातील धान्याची जादा दरात विक्री केल्याप्रकरणी सोनुर्ली (वन) येथील व्यावसायिकाचा परवाना रद्द करण्यात आला आहे. तहसीलदार महेंद्र वाकलेकर यांनी चौकशीअंती परवाना रद्दचे आदेश दिले.

अंत्योदय योजनेची शिधापत्रिका असलेल्या कुटूंबियांना २९० रुपयांत धान्य दिले जाते. त्यामध्ये ६० किलो तांदूळ, ४५ किलो गहू व एक किलो साखर अशा वस्तुंचा समावेश आहे. सोनुर्ली येथील स्वस्त धान्य दुकानदाराने ‘कोरोना’मुळे असलेल्या लॉकडाऊनचा गैरफायदा घेतला. २९० रुपयांऐवजी ५०० रुपये एकत्रित घेत ४५ किलो तांदूळ, ४५ किलो गहू व एक किलो साखरच वितरित केली.

याप्रकरणी तहसीलदार महेंद्र वाकलेकर यांच्याकडे तक्रारी करण्यात आल्या होत्या. याची गंभीर दखल घेत तहसीलदारांकडून चौकशी करण्यात आली. चौकशी दरम्यान दुकानदार दिलीप आस्वले हे दोषी आढळले. त्यामुळे या दुकानाचा परवाना रद्द करण्याचे आदेश तहसीलदारांकडून देण्यात आले.