पुणे जिल्ह्यातील ऊसतोडणी कामगार निघाले गावाकडे

पुणे  : ‘कोरोना’च्या पार्श्वभूमीवर लॉकडाउन सुरु असून सरकारने जिल्हा बंदी केल्याने ऊस तोडणी कामगारांना आपल्या गावाकडे जाता येत नव्हते. त्यामुळे पुणे जिल्ह्यातील साखर कारखाना स्थळांवर सुमारे ४० ते ५० हजार ऊसतोडणी कामगार अडकून पडले होते. मात्र, दोन ते तीन दिवसांपूर्वी शासनाने त्यांना गावी जाण्यास मुभा देण्याचा निर्णय घेतल्याने ऊस तोडणी कामगार आता गावाकडे निघाले आहेत.

जिल्ह्यात चालू वर्षी गळीत हंगामात १८ साखर कारखान्यांपैकी सुमारे १६ कारखान्यांनी गाळप सुरू केले होते. सध्या जिल्ह्यातील कारखान्यांचे गाळप टप्याटप्याने बंद होत आहे. त्यामुळे ऊस तोडणी कामगार घरी जाण्याची तयारी करत आहे. दरवर्षी ऊस तोडणीसाठी हंगाम सुरू होण्यापूर्वीच कामगारांचे करार होतात. यावर्षी जिल्ह्यात लहान मोठे असे एक लाखांहून अधिक ऊसतोडणी कामगार विविध कारखान्यांच्या कार्यस्थळावर आले होते. यावर्षी ऊस गळीत हंगाम लांबला नाही. मात्र, थोडाफार शिल्लक असलेल्या उसाच्या तोडणीचे काम करून कामगार कारखाना कार्यस्थळावरच थांबले होते.

गेल्या दहा ते पंधरा दिवसांपासून कोरोना बाधितांच्या संख्येत वाढ होत आहे. या पार्श्वभूमीवर ऊसतोडणी कामगारांना गावाकडची ओढ लागली आहे. परंतु, एका जिल्ह्यातून दुसऱ्या जिल्ह्यात जाता येत नव्हते. त्यामुळे हंगाम संपत आला तरी ४० ते ५० हजार ऊस तोडणी कामगारांना त्यांच्या गावाकडे जाणे अवघड झाले होते. त्यातच जिल्हा प्रशासनाने ऊस तोडणी कामगारांची सर्व व्यवस्था संबंधित कारखान्याने करावी, अशी सूचना केली होती. त्यामुळे हे कामगार कारखाना कार्यस्थळावरच थांबून होते. कामगारांच्या परिस्थितीचा विचार करून शासनाने आदेश काढला असून वैद्यकीय तपासणी करून कामगारांना त्यांच्या मूळगावी जाण्याची परवानगी देण्यात आली आहे.