चार हजार ऊस तोडणी कामगारांना प्रतीक्षा आंतरराज्य परवान्याची

इचलकरंजी, जि. कोल्हापूर   : ऊस तोडणीसाठी आलेल्या कामगारांना आंतरराज्य प्रवास करण्यास अडथळे येत असल्याने जिल्ह्यातील सुमारे चार हजारपेक्षा अधिक कुटुंबे अद्याप कारखाना कार्यस्थळांवर थांबून आहेत. महाराष्ट्रातील कामगार त्यांच्या जिल्ह्यात परत गेले असली तरी शेजारच्या कर्नाटक, मध्यप्रदेश आणि आसाम या ठिकाणाहून आलेले अनेक कामगार त्यांच्या राज्यांच्या परवानगीच्या प्रतीक्षेत आहेत. बहुराज्य पाच कारखान्यांचे अनेक ऊसतोडणी कामगार कर्नाटकातून महाराष्ट्रात येण्यास परवानगीच्या प्रतीक्षेत आहेत.

कोल्हापूर जिल्ह्यातील पाच साखर कारखाने बहुराज्य परवानाधारक आहेत. या कारखान्यांचे कार्यक्षेत्र महाराष्ट्र आणि कर्नाटक आहे. या कारखान्यांमध्ये गुरुदत्त शिरोळ, पंचगंगा इचलकरंजी, जवाहर हुपरी, शाहू कागल आणि दत्त शिरोळ या कारखान्यांचा समावेश आहे. या कारखाना कार्यक्षेत्रातील अनेक कामगार महाराष्ट्रातून कर्नाटकात आणि कर्नाटकातून महाराष्ट्रात आले आहेत. त्याचबरोबर ऊस तोडणीच्या अनेक टोळ्या यावर्षी मध्य प्रदेश आणि आसाम येथूनही आल्या आहेत.

कोल्हापूर जिल्ह्यातील प्रशासनाने शासनाच्या परवानगीनुसार जिल्ह्यातील सर्व ऊस तोडणी कामगारांना महाराष्ट्रातील त्यांच्या जिल्ह्यांमध्ये पाठवले आहे. मात्र परराज्यातील असलेले अनेक कामगार त्यांच्या राज्याच्या परवानगीच्या प्रतीक्षेत आहेत. सध्या अनेक कारखान्यांनी या ऊसतोडणी कामगारांच्या कुटुंबांना कारखाना कार्यस्थळावर आधार दिला आहे. त्यांची सर्व व्यवस्था केली असली तरी या सर्व कुटुंबांना गावाकडे जाण्याची मोठी ओढ लागली आहे. तसेच त्यांना शेतीकामांचीही धाकधूक लागली आहे.

कोल्हापूर जिल्ह्यातील परराज्यातील कामगारांच्या संख्येपैकी विशेषतः कर्नाटकातील कामगारांची संख्या मोठी आहे. त्याचबरोबर सीमाभागातील कर्नाटकातील अनेक गावांत महाराष्ट्रातील ही कामगार अडकून पडले आहेत. कर्नाटक शासन कोल्हापूर जिल्ह्यात असलेल्या ऊसतोडणी कामगारांना आपल्या गावांमध्ये येण्यासाठी अद्यापही परवानगी देत नाही. त्यामुळे या कामगारांची चिंता अधिकच वाढली आहे.